തിരുവനന്തപുരം: ശബരിമല വിഷയത്തിൽ കൊടിപിടിച്ചിള്ള സമരം വേണ്ടെന്നും നേതാക്കൾ പ്രകോപനപരമായ സമരരീതികളിലേക്ക് കടക്കരുതെന്നും കോൺഗ്രസ് ദേശീയ അദ്ധ്യക്ഷൻ രാഹുൽ ഗാന്ധി. ഇക്കാര്യത്തിൽ തീവ്രസമരം വേണ്ടെന്നും കേരള നേതാക്കളോട് രാഹുൽ ഗാന്ധി വ്യക്തമാക്കി.

ശബരിമല വിഷയത്തിൽ രാഹുൽ ഗാന്ധിയുമായി കെ.പി.സി.സി പ്രസിഡന്റ് മുല്ലപ്പള്ളി രാമചന്ദ്രനും പ്രതിപക്ഷ നേതാവ് രമേശ് ചെന്നിത്തലയും കൂടിക്കാഴ്ച നടത്തിയിരുന്നു. ശബരിമല വിഷയത്തിൽ കേന്ദ്ര നേതൃത്വത്തിനും സംസ്ഥാന നേതൃത്വത്തിനും അഭിപ്രായ വ്യത്യാസമില്ലെന്നാണ് ചർച്ചയ്ക്ക് ശേഷം മുല്ലപ്പള്ളി പറഞ്ഞത്.

ശബരിമലയിൽ പ്രായഭേദമന്യേ സ്ത്രീകൾക്ക് പ്രവേശിക്കാമെന്ന സുപ്രീം കോടതി വിധി വന്നതിന് പിന്നാലെ ചരിത്രമെന്നാണ് കോൺഗ്രസ് വിശേഷിപ്പിച്ചത്. ഇതേ നിലപാട് കേരളത്തിലെ നേതാക്കളും തുടക്കത്തിലെ സ്വീകരിച്ചിരുന്നു. എന്നാൽ പിന്നീട് നിലപാട് മാറ്റിയ കോൺഗ്രസ് പ്രത്യക്ഷസമരം ആരംഭിക്കുകയായിരുന്നു.