ഐഫോൺ കുടുംബത്തിലെ ഏറ്റവും വിലകുറഞ്ഞ ഫോൺ എന്ന പരസ്യവാചകത്തിലെത്തുന്ന ഐഫോൺ ടെൺ ആർ ഒക്ടോബർ 26നു ഇന്ത്യൻ വിപണിയിലെത്തും. മറ്റു ഐഫോണുകൾക്ക് വിരുദ്ധമായി ആദ്യ പാദ വിൽപനയിൽ തന്നെ ഫോൺ ഇന്ത്യയിലെത്തും. നിങ്ങൾ അറിഞ്ഞിരിക്കേണ്ട ഐഫോൺ ടെൺ ആറിന്റെ 10 പ്രത്യേകതകൾ :

1)​ ഐഫോൺ ടെൺ എസിലും ഐഫോൺ ടെൺ എസ് മാക്‌സിലും ഉപയോഗിച്ച എ12 ബയോണിക് പ്രോസസറാണ് ഐഫോൺ ടെൺ ആറിലും ഉപയോഗിച്ചിരിക്കുന്നത്.

2)​ ഒരു ഐഫോണിലുള്ള ഏറ്റവും വലിയ എൽ.സി.ഡിയാണ് ഐഫോൺ ടെൺ ആറിലുള്ളതെന്ന് ആപ്പിൾ അവകാശപ്പെടുന്നു. ഒരു സ്‌മാർട്ട്ഫോണിലുള്ള ഏറ്റവും കട്ടിയുള്ള ഗ്ളാസാണിതിൽ ഉപയോഗിച്ചിരിക്കുന്നതെന്നും ആപ്പിൾ പറയുന്നു.

3)​ മറ്റു ഐഫോണുകളിൽ നിന്നും ഐഫോൺ ടെൺ ആറിന്റെ ഏറ്റവും വലിയ മാറ്റം അതിന്റെ സ്ക്രീനാണ്. മുൻ ഐഫോണുകളിൽ ഉപയോഗിച്ച ഒ.എൽ.ഇ.ഡി ഡിസ്‌പ്ലേക്ക് പകരം എൽ.സി.ഡി ഡിസ്‌പ്ലേ ആണിതിൽ ഉപയോഗിച്ചിരിക്കുന്നത്.

4)​ 12 മെഗാപിക്‌സൽ എഫ്/1.8 അപ്പെർച്ചർ വൈഡ് ആങ്കിൾ ലെൻസ് കാമറയാണ് ഐഫോൺ ടെൺ ആറിന്റെ കാമറാക്കണ്ണ്.

5)​ ജ്യേഷ്ടന്മാരെ പോലെ 512 ജി.ബി മോഡലിൽ ഐഫോൺ ടെൺ ആർ വരില്ല. 64,​ 128,​ 256 ജിബി മോഡലുകളിലാകും ടെൺ ആറിന്റെ വരവ്.

6)​ 6 നിറങ്ങളിലാകും ഐഫോൺ ടെൺ ആർ വിപണിയിലെത്തുക - 2018ലെ ഏതൊരു ഫോണിനേക്കാളുമധികം.

7)​ ത്രീഡി ടച്ച് സംവിധാനം ഒഴിവാക്കിയാകും ടെൺ ആ‍ർ എത്തുക.

8)​ ഒരു മീറ്റർ ആഴമുള്ള ജലത്തിൽ 30 മിനിറ്റ് വരെ ഐഫോൺ ടെൺ ആറിന് വാട്ടർ റെസിസ്‌റ്റൻസ് ഉണ്ടാകും.

9)​ ഏഴ് മെഗാപിക്സലിന്റെ സെൽഫി കാമറയാണ് ഐഫോൺ ടെൺ ആറിലുള്ളത്. റെറ്റിന ഫ്ളാഷ്,​ വൈഡ് കളർ ക്യാപ്ചർ,​ സ്മാർട്ട് എച്ച്.ഡി.ആർ,​ പോട്രെയിറ്റ് മോഡ് തുടങ്ങി അത്യാധുനിക സംവിധാനങ്ങൾ ഇതിലുണ്ട്. ഐഫോൺ ടെൺ എസിലും ഐഫോൺ ടെൺ എസ് മാക്സിലും സമാനമായ സെൽഫി കാമറയാണുള്ളത്.

10)​ 2018ൽ ഇറങ്ങിയ ഐഫോണുകളിൽ ഏറ്റവും കൂടുതൽ ബാറ്ററി ബാക്കപ്പുള്ള ഫോണാണ് ഐഫോൺ ടെൺ ആർ. 15 മണിക്കൂർ ഇന്റർനെറ്റ് ഉപയോഗിക്കാനോ 16 മണിക്കൂർ വീഡിയോ കാണുവാനോ ഒരു ഫുൾ ചാർജിലൂടെ സാധിക്കും.

76,​900 രൂപയ്ക്കാണ് ഐഫോൺ ടെൺ ആർ ഇന്ത്യൻ വിപണിയിലെത്തുക.