അനാർക്കലിക്ക് ശേഷം സച്ചി രചനയും സംവിധാനവും നിർവഹിക്കുന്ന ചിത്രത്തിൽ പൃഥ്വിരാജും സുരാജും പ്രധാന വേഷങ്ങൾ അവതരിപ്പിക്കുന്നു. പൃഥ്വിരാജ് പ്രൊഡക്ഷൻസിന്റെ ബാനറിൽ പൃഥ്വിരാജ് തന്നെയാണ് ഈ ചിത്രം നിർമ്മിക്കുന്നത്.
മോഹൻലാൽ നായകനാകുന്ന ലൂസിഫറിന്റെ ചിത്രീകരണത്തിരക്കിലാണ് പൃഥ്വിരാജ് ഇപ്പോൾ. ഇന്ന് വാഗമണ്ണിൽ ഷെഡ്യൂൾ പാക്കപ്പാകും . അടുത്ത ഷെഡ്യൂൾ ചിത്രീകരിക്കുന്നത് മുംബയിലാണ്.മാർച്ച് 28-നാണ് ലൂസിഫർ തിയേറ്ററുകളിലെത്തുന്നത്. ലൂസിഫർ പൂർത്തിയാക്കിയ ശേഷം അഭിനയത്തിലും നിർമ്മാണത്തിലും ശ്രദ്ധ കേന്ദ്രീകരിക്കാനാണ് പൃഥ്വിരാജിന്റെ തീരുമാനം.
മാർച്ചിൽ തുടങ്ങുന്ന സച്ചി ചിത്രത്തിന് ശേഷം ഒരുപിടി ചിത്രങ്ങൾ നിർമ്മിക്കാനുള്ള ഒരുക്കത്തിലാണ് പൃഥ്വിരാജ് .സച്ചിയുടെ ചിത്രത്തിന് ശേഷം കലാഭവൻ ഷാജോൺ രചനയും സംവിധാനവും നിർവഹിക്കുന്ന ബ്രദേഴ്സ് ഡേയിലാണ് പൃഥ്വിരാജ് അഭിനയിക്കുന്നത്.ആക്ഷനും കോമഡിയുമെല്ലാം നിറഞ്ഞ ഒരു എന്റർടെയ്നറായിരിക്കും ബ്രദേഴ്സ് ഡേയെന്ന് ഷാജോൺ പറഞ്ഞു.അടുത്ത കൊല്ലം പൃഥ്വിരാജ് ചെയ്യുന്ന ബിഗ് ബഡ്ജറ്റ് ചിത്രം നവാഗതനായ എസ്. മഹേഷ് സംവിധാനം ചെയ്യുന്ന കാളിയനാണ്.