കഴുത്തിന്റെ സൗന്ദര്യത്തെ നഷ്ടപ്പെടുത്തുന്ന പ്രശ്നങ്ങൾ നിരവധിയാണ്. കഴുത്തിൽ അമിതമായി കൊഴുപ്പ് അടിഞ്ഞുകൂടൽ, മാലിന്യങ്ങൾ അടിഞ്ഞുകൂടിയുണ്ടാകുന്ന പാടുകൾ, കഴുത്തിലെ കറുത്ത നിറം തുടങ്ങിയവയാണ് പലരെയും അലട്ടുന്ന പ്രധാന പ്രശ്നം. ശരീരഭാരം വർദ്ധിച്ചാൽ കഴുത്തിൽ കൊഴുപ്പടിയുകയും മാംസപേശികൾ തൂങ്ങിക്കിടന്ന് അഭംഗി വരുകയും ചെയ്യും. കൂടാതെ ഇരിക്കുമ്പോഴും നിൽക്കുമ്പോഴും തല നേരെ പിടിക്കാതെ തല താഴ്ത്തിയിടുകയാണെങ്കിൽ കഴുത്തിലെ ചർമ്മം ചുക്കിച്ചുളിഞ്ഞ് സൗന്ദര്യം നഷ്പ്പെടാനുള്ള സാധ്യതയും ഏറെയാണ്. ഒന്ന് ശ്രദ്ധിച്ചാൽ മുഖസൗന്ദര്യം പോലെ കഴുത്തിന്റെ ഭംഗിയും നിലനിറുത്താവുന്നതേയുള്ളൂ. കഴുത്തിന്റെ ഭംഗി വർദ്ധിപ്പിക്കാൻ പ്രധാനമായി ചെയ്യേണ്ട കാര്യം ഉഴിച്ചിലാണ്. കഴുത്തിനു താഴെ നിന്നും താടിയുടെ ഭാഗത്തേക്ക് ഉഴിയുക. ബദാം ഓയിൽ, തണ്ണിമത്തൻ നീര് എന്നിവയിൽ ഏതെങ്കിലുമൊന്നുപയോഗിച്ച് ഈ രീതിയിൽ മസാജ് ചെയ്യാം. ഇല്ലെങ്കിൽ പഴുത്ത പപ്പായയിൽ കാരറ്റ് നീര്, വെള്ളരിക്കാ നീര് ഇവ മിക്സ് ചെയ്തും മസാജ് ചെയ്യാം.