തിരുവനന്തപുരം:കേരള സംസ്ഥാന ചലച്ചിത്ര അക്കാഡമി സംഘടിപ്പിക്കുന്ന 23ആം കേരള രാജ്യാന്തര ചലച്ചിത്ര മേളയുടെ മത്സര വിഭാഗത്തിലേക്ക് മലയാളത്തിൽ നിന്ന് ലിജോ ജോസ് പെല്ലിശ്ശേരി സംവിധാനം ചെയ്ത 'ഈ.മ.യൗ', സക്കറിയ സംവിധാനം ചെയ്ത 'സുഡാനി ഫ്രം നൈജീരിയ' എന്നീ ചിത്രങ്ങൾ തിരഞ്ഞെടുത്തതായി ചലച്ചിത്ര അക്കാഡമി ചെയർമാൻ കമൽ വാർത്താസമ്മേളനത്തിൽ അറിയിച്ചു. മലയാളം സിനിമ ഇന്ന് വിഭാഗത്തിൽ 12 സിനിമകൾ പ്രദർശിപ്പിക്കും.കഴിഞ്ഞതവണ ഈ പാക്കേജിൽ ഏഴ് സിനിമകളായിരുന്നു ഉണ്ടായിരുന്നത്.

മേളയുടെ ഡെലിഗേറ്റ് രജിസ്‌ട്രേഷൻ നവംബർ ഒന്നിന് തുടങ്ങും.അക്കാഡമിയുടെ കണ്ണൂർ,കോഴിക്കോട്,തൃശ്ശൂർ,കോട്ടയം,തിരുവനന്തപുരം മേഖലാ കേന്ദ്രങ്ങൾ വഴിയായിരിക്കും രജിസ്‌ട്രേഷൻ.ഓരോ കേന്ദ്രത്തിൽനിന്നും 500 പാസുകൾ വീതം വിതരണം ചെയ്യും.ഇതിൽ 200 പാസുകൾ 50 വയസ്സിനു മുകളിലുള്ള പൗരന്മാർക്കായി നീക്കിവച്ചിട്ടുണ്ട്.ഓൺലൈൻ രജിസ്‌ട്രേഷൻ നവംബർ 10ന് ആരംഭിക്കും.ഡെലിഗേറ്റ് ഫീസ് 2000 രൂപയാണ്.വിദ്യാർത്ഥികൾക്ക് 1000 രൂപ.പ്രളയക്കെടുതിയുടെ പശ്ചാത്തലത്തിൽ ചെലവുചുരുക്കി നടത്തുന്നതിനാൽ ഇത്തവണ സൗജന്യ പാസുകൾ ഉണ്ടായിരിക്കില്ല. ഡിസംബർ ഏഴ് മുതൽ 13 വരെയാണ് മേള.14 തീയേറ്ററുകളിലായി നൂറ്റമ്പതോളം സിനിമകളാണ് പ്രദർശിപ്പിക്കുക. വാർത്താസമ്മേളനത്തിൽ അക്കാ‌ഡമി ഉപാദ്ധ്യക്ഷ ബീനാപോൾ,സെക്രട്ടറി മഹേഷ് പഞ്ചു,സിബിമലയിൽ തുടങ്ങിയവരും പങ്കെടുത്തു.

മലയാളം സിനിമ ഇന്ന് വിഭാഗത്തിലേക്ക് തിരഞ്ഞെടുക്കപ്പെട്ടവ

1. ഓത്ത് -പി.കെ ബിജുക്കുട്ടൻ
2. പറവ-സൗബിൻ സാഹിർ
3. ഭയാനകം-ജയരാജ്
4. ഉടലാഴം-ഉണ്ണികൃഷ്ണൻ ആവള
5. മായാനദി-ആഷിഖ് അബു
6. ബിലാത്തിക്കുഴൽ-വിനു എ.കെ
7. പ്രതിഭാസം-വിപിൻ വിജയ്
8. ഈട-ബി.അജിത്കുമാർ
9. കോട്ടയം-ബിനു ഭാസ്‌കർ
10. ഹുമൻസ് ഓഫ് സംവൺ-സുമേഷ്ലാൽ
11. സ്ലീപ്‌ലെസ്ലി യുവേഴ്സ്-ഗൗതം സൂര്യ
12. ആവേ മരിയ-വിപിൻ രാധാകൃഷ്ണൻ