ആരാധകർ ഏറെ ആകാംക്ഷയോടെ കാത്തിരിക്കുന്ന വിവാഹമാണ് ദീപിക പദുകോൺ രൺവീർ സിംഗ് ജോടികളുടേത്. നവംബർ 14, 15 തീയതികളിലായി ഇറ്റലിയിൽ വച്ചായിരിക്കും വിവാഹമെന്നാണ് അറിയുന്നത്. രണ്ട് ദിവസം നീണ്ടു നിൽക്കുന്ന വിവാഹ ആഘോഷങ്ങളാണ് ഇരുവരുടെയും വീട്ടുകാർ ഒരുക്കിയിരിക്കുന്നത്. 14ന് സൗത്തിന്ത്യൻ ശൈലിയിലും 15ന് നോർത്തിന്ത്യൻ ശൈലിയിലുമാകും വിവാഹം എന്നാണ് അറിയുന്നത്.

ഇറ്റലിയിലെ വിവാഹത്തിൽ പങ്കെടുക്കാൻ സിനിമാ മേഖലയിൽ നിന്ന് ഷാരൂഖ് ഖാൻ, ഫറാ ഖാൻ, ആദിത്യ ചോപ്ര,സഞ്ജയ് ലീല ബൻസാലി എന്നിവർക്ക് മാത്രമാണ് ക്ഷണമുള്ളത്. രൺവീറിന്റെ പ്രിയസുഹൃത്ത് പ്രിയങ്ക ചോപ്രയെയും വിവാഹത്തിന് ക്ഷണിക്കുമെന്നാണ് അറിയുന്നത്. ബാംഗ്ലൂർ സ്വദേശിയാണ് ദീപിക. അതുകൊണ്ടു തന്നെ 14ന് കന്നഡ രീതിയിലുള്ള ചടങ്ങുകളാകും നടക്കുക. വിവാഹത്തിന് അടുത്ത ബന്ധുക്കളടക്കം 200ൽ താഴെ പേരാണ് പങ്കെടുക്കുക. സബ്യസാചി ഡിസൈൻ ചെയ്ത വസ്ത്രങ്ങൾ ധരിച്ചാകും ഇരുവരും വിവാഹ ചടങ്ങുകളിൽ പങ്കെടുക്കുക. വിവാഹ ശേഷം സുഹൃത്തുക്കൾക്കായി രണ്ട് വിവാഹ സത്ക്കാരങ്ങൾ താരങ്ങൾ ഒരുക്കിയിട്ടുണ്ട്. ഒന്ന് മുംബയിലും മറ്റൊന്ന് ബാംഗ്ലൂരിലുമാണ്. മുംബയിലെ ഗ്രാന്റ് ഹയത്ത് ഹോട്ടലിലും ബാംഗ്ലൂരിലെ ലീല പാലസിലുമാണ് വിരുന്നു സത്കാരം. ബാംഗ്ലൂരിൽ നവംബർ 21നാണ് സത്കാരം ഒരുക്കിയിരിക്കുന്നത്. മുംബയിലെ തീയതി പുറത്തുവിട്ടിട്ടില്ല.

വിവാഹം കഴിഞ്ഞാലും തന്റെ ജീവിതത്തിൽ വലിയ മാറ്റങ്ങളൊന്നും സംഭവിക്കില്ലെന്ന് ഒരു അഭിമുഖത്തിൽ വ്യക്തമാക്കിയിരിക്കുകയാണ് ദീപിക. തന്റെ മാതാപിതാക്കളെ പോലെ വിവാഹ ജീവിതം സന്തോഷകരമായി മുന്നോട്ടു കൊണ്ടു പോകണമെന്നും വളരെയധികം പ്രതീക്ഷയോടെ യാണ് വിവാഹത്തെ നോക്കിക്കാണുന്നതെന്നും ജീവിതവും പ്രൊഫഷനും മികച്ച രീതിയിൽ മുന്നോട്ടു കൊണ്ടുപോകുമെന്നും താരം പറഞ്ഞു.