ന്യൂഡൽഹി: ശബരിമലയിലെ സ്ത്രീ പ്രവേശന വിഷയത്തിൽ കേരളത്തിലെ കോൺഗ്രസ് നേതൃത്വത്തിന്റെ നിലപാട് തള്ളി കോൺഗ്രസ് അദ്ധ്യക്ഷൻ രാഹുൽ ഗാന്ധി രംഗത്ത്. ശബരിമലയിലെന്നല്ല എല്ലായിടത്തും സ്ത്രീകൾക്ക് പ്രവേശനം അനുവദിക്കണമെന്ന് രാഹുൽ പറഞ്ഞു. കേരളത്തിലെ കോൺഗ്രസ് നേതൃത്വം ശബരിമലയിലെ സ്ത്രീ പ്രവേശനത്തെ എതിർക്കുമ്പോഴാണ് രാഹുൽ തന്റെ നിലപാട് വ്യക്തമാക്കിയത്.

ശബരിമല വിഷയത്തിൽ കേരളത്തിലെ കോൺഗ്രസ് നേതൃത്വത്തിന്റെ നിലപാടിന് വിരുദ്ധമാണ് എന്റെ നിലപാട്. എന്റെ വ്യക്തിപരമായ അഭിപ്രായമാണ് ഞാൻ പറയുന്നത്. പുരുഷനും സ്ത്രീയും തുല്യരാണ്. സ്ത്രീകളെ എല്ലായിടത്തും പ്രവേശിക്കാൻ അനുവദിക്കണം - രാഹുൽ പറഞ്ഞു. ശബരിമല വൈകാരിക വിഷയമാണെന്നാണ് കേരളത്തിലെ പാർട്ടിയുടെ നിലപാടെന്നും അദ്ദേഹം കൂട്ടിച്ചേർത്തു.