രോഗകാരി: ഈഡിസ് കൊതുകുകൾ

രോഗം സ്ഥിരീകരക്കാൻ: ആർ.ടി.പി.സി.ആർ ടെസ്​റ്റ്

രോഗലക്ഷണങ്ങൾ

01. പനി

02. തലവേദന

03. ശരീരവേദന

04. സന്ധിവേദന

05. ചെറിയ പാടുകൾ

06. ശരീരത്ത് തിണർപ്പ്

07.കണ്ണിന് ചുവപ്പ്

കൊല്ലം: ജയ്‌പൂരിൽ കൊതുകുജന്യ രോഗമായ സിക്കാ വൈറസ് രോഗം റിപ്പോർട്ട് ചെയ്ത സാഹചര്യത്തിൽ ജില്ലയിൽ പൊതുജനങ്ങൾ ജാഗ്രത പാലിക്കണമെന്ന് ജില്ലാ മെഡിക്കൽ ഓഫീസർ ഡോ. വി.വി. ഷേർളി അറിയിച്ചു. ഈഡിസ് കൊതുകുകളാണ് രോഗം പരത്തുന്നത്. രോഗബാധിതരിൽ നിന്ന് രക്തം സ്വീകരിക്കുക, ലൈംഗിക ബന്ധത്തിൽ ഏർപ്പെടുക എന്നിങ്ങനെയും ഗർഭാവസ്ഥയിലോ പ്രസവ സമയത്തോ അമ്മയിൽ നിന്ന് കുഞ്ഞിലേക്കും രോഗം പകരാൻ സാദ്ധ്യതയുണ്ട്.
പനി, തലവേദന, ശരീരവേദന, സന്ധി വേദന, തൊലിപ്പുറത്തുണ്ടാകുന്ന ചെറിയ പാടുകൾ, ശരീരത്ത് തിണർപ്പ്, കണ്ണിന് ചുവപ്പ് എന്നിവയാണ് ലക്ഷണങ്ങൾ. നാഡിവ്യൂഹ സംബന്ധിയായ തളർച്ചയും ഉണ്ടാകാനിടയുണ്ട്. ആർ.ടി.പി.സി.ആർ ടെസ്​റ്റ് വഴി രോഗം സ്ഥിരീകരിക്കാം.
നിർജലീകരണം ഒഴിവാക്കാനും പനി കുറയ്ക്കാനും വിശ്രമത്തോടൊപ്പം ലഘുപാനീയങ്ങൾ കുടിക്കണം. രോഗം റിപ്പോർട്ട് ചെയ്ത രാജ്യങ്ങളിൽ നിന്ന് വരുന്നവർക്ക് രണ്ടാഴ്ച്ചയ്ക്കകം പനി വരുന്നുണ്ടെങ്കിൽ സിക്കാ വൈറസ് രോഗം സംശയിക്കാം.

കൊതുകു നിയന്ത്റണം ഊർജ്ജിതപ്പെടുത്തുകയും വീട്ടിലും പരിസരത്തും വെള്ളം കെട്ടിനിൽക്കാതെ ശ്രദ്ധിക്കുകയും വേണം. കൊതുകുവല, വ്യക്തിഗത സുരക്ഷാ മാർഗ്ഗങ്ങൾ എന്നിവയും സ്വീകരിക്കണം. കൊതുകു നിർമ്മാർജ്ജനത്തിനായി ഉറവിട നശീകരണം, സ്‌പ്രേയിംഗ്, ഫോഗിംഗ് എന്നിവ ഊർജ്ജിതപ്പെടുത്തണം.

ഡോ. വി.വി. ഷേർളി, ജില്ലാ മെഡിക്കൽ ഓഫീസർ