ഗുരുവായൂർ: ഗുരുവായൂർ ക്ഷേത്രത്തിൽ എഴുത്തിനിരുത്തിയത് നൂറുകണക്കിന് കുട്ടികളെ. രാവിലെ ശീവേലിക്ക് ശേഷം കൂത്തമ്പലത്തിൽ പ്രത്യേകം തയ്യാറാക്കിയ നവരാത്രി മണ്ഡപത്തിൽ ക്ഷേത്രം ഓതിക്കൻ സരസ്വതി പൂജ നടത്തിയതിന് ശേഷമായിരുന്നു എഴുത്തിനിരുത്തൽ. കൂത്തമ്പലത്തിൽ നിന്നും ഗുരുവായൂരപ്പൻ, സരസ്വതി, ഗണപതി എന്നീ ദേവന്മാരുടെ ഛായാചിത്രങ്ങൾ വിദ്യാരംഭ മണ്ഡപത്തിലേക്ക് കുത്തുവിളക്കിന്റെയും വാദ്യഘോഷങ്ങളുടെയും അകമ്പടിയിൽ എഴുന്നള്ളിച്ചു.

തുടർന്നായിരുന്നു ക്ഷേത്രത്തിന് പടിഞ്ഞാറ് ഭാഗത്തെ ആദ്ധ്യാത്മിക ഹാളിൽ എഴുത്തിനിരുത്തൽ ചടങ്ങുകൾ. ക്ഷേത്രത്തിലെ 13 കീഴ്ശാന്തി കുടുംബങ്ങളിലെ കാരണവന്മാർ കുട്ടികൾക്ക് ആദ്യാക്ഷരം പകർന്നു നൽകി. കുരുന്നുകളുടെ നാവിൽ ആദ്യം സ്വർണ്ണം കൊണ്ട് ഹരിശ്രീ കുറിച്ച ശേഷം തളികയിലെ അരിയിൽ ആദ്യാക്ഷരം കുറിച്ചു. കുരുന്നുകൾക്ക് പ്രസാദമായി ഭഗവാന് നിവേദിച്ച പഴം, പട്ടുകോണകം, പട്ട് എന്നിവ ദേവസ്വം അധികാരികൾ നൽകി. വിജയദശമിദിനമായ ഇന്നലെ ക്ഷേത്രത്തിൽ ദർശനത്തിനും ഏറെ തിരക്കനുഭവപ്പെട്ടു.

മമ്മിയൂർ മഹാദേവ ക്ഷേത്രത്തിൽ വിജയദശമി നാളിൽ ആദ്യാക്ഷം കുറിക്കാൻ നൂറുകണക്കിന് കുരുന്നുകൾ എത്തി. നവരാത്രിയുടെ ഭാഗമായി സരസ്വതി മണ്ഡപത്തിലായിരുന്നു ചടങ്ങ്. ക്ഷേത്രം മേൽശാന്തിമാരായ ശ്രീരുദ്രം നമ്പൂതിരി, മുരളി നമ്പൂതിരി എന്നിവരാണ് ആദ്യാക്ഷരം പകർന്ന് നൽകിയത്. സംഗീതോത്സവത്തിൽ ആയിരക്കണക്കിന് സംഗീതാർത്ഥികൾ പങ്കെടുത്തു. കലാമണ്ഡലം കൃഷ്ണകുമാറും സംഘവും അവതരിപ്പിച്ച കല്യാണ സൗഗന്ധികം കഥകളിയോടെ പരിപാടികൾക്ക് സമാപനം കുറിച്ചു. ക്ഷേത്രം എക്‌സിക്യൂട്ടീവ് ഓഫീസർ എം.വി സദാശിവൻ, ട്രസ്റ്റി ബോർഡ് ചെയർമാൻ ജി.കെ പ്രകാശൻ, ട്രസ്റ്റി ബോർഡ് അംഗങ്ങളും നേതൃത്വം നൽകി. . ..