കീവ്: ശുദ്ധമായ പ്രാണവായു വേണോ?. നാലുകുപ്പിക്ക് വെറും 7,350 രൂപ.  ന്യൂസിലാൻഡിലാണ്  പ്രാണവായു  വില്പനയ്ക്ക്  വച്ചിരിക്കുന്നത്. വിമാനത്താവളങ്ങളിലെ  ഡ്യൂട്ടിഫ്രീ  ഷോപ്പുകളിലടക്കം  വാങ്ങാൻ കിട്ടും. കിവിയാന എന്ന കമ്പനിയാണ് വായു വിപണയിലെത്തിച്ചത്. 

ഉപയോഗിക്കേണ്ടത് എങ്ങനെയെന്ന് കുപ്പിയുടെ പുറത്ത് വ്യക്തമായി എഴുതിയിട്ടുണ്ട്. ഭാഷ അറിയില്ലെങ്കിലും പ്രശ്നമില്ല. ചിത്രങ്ങൾ സഹായത്തിനെത്തും. ശ്വസിക്കാനുള്ള മാസ്കുകളും കുപ്പികളിലുണ്ടാവും. ഉപഭോക്താക്കളെ ആകർഷിക്കാൻ ചില ഒാഫറുകളും പ്രഖ്യാപിച്ചിട്ടുണ്ട്. കുപ്പികൾക്കൊപ്പം വലിയ ബോട്ടിലുകളിലും വായു ലഭിക്കും. ഇൗ വായു ശ്വസിക്കുന്നവർക്ക് നവോന്മേഷം ലഭിക്കുമെന്നാണ് കമ്പനിയുടെ അവകാശവാദം.

ലോകത്തെ ഏറ്റവും ശുദ്ധമായ വായുവാണ് വിൽക്കുന്നതെന്നാണ് കമ്പനി പറയുന്നത്.  ന്യൂസിലൻഡിലെ ദക്ഷിണ പർവതമേഖകളിൽ നിന്നാണ് വായു ശേഖരിക്കുന്നത്. ഒന്നുകൂടി ശുദ്ധമാക്കിയശേഷം പ്രത്യേക സംവിധാനമുപയോഗിച്ച് കുപ്പികളിൽ നിറയ്ക്കും. അതിനാൽ മാലിന്യത്തിന്റെ പൊടിപോലും കാണില്ല. വായുശേഖരിക്കുന്ന സ്ഥലത്തെക്കുറിച്ചുള്ള കൂടുതൽ വിവരങ്ങളും കമ്പനി നൽകുന്നുണ്ട്. ഈ പ്രദേശങ്ങളിൽ നാഗരികത തൊട്ടുതീണ്ടിയിട്ടില്ല. മനുഷ്യവാസം കിലോമീറ്ററുകൾക്കപ്പുറമാണെന്നും കമ്പനി പറയുന്നു. അധികം വൈകാതെ പ്രാണവായുകൂടുതൽ രാജ്യങ്ങളിലേക്ക് എത്തിക്കാനാണ് കമ്പനിയുടെ തീരുമാനം.

ആദ്യമായല്ല പ്രാണവായു വിൽപ്പനയ്ക്കെത്തുന്നത്. ഏറ്റവുമധികം അന്തരീക്ഷ മലിനീകരണം നേരിടുന്ന ചൈനയിൽ പ്രാണവായു കുപ്പിയിലടച്ച് വിറ്റിരുന്നു.