ചാത്തന്നൂർ: പൊലീസിനെ കണ്ടുഭയന്ന് ഇത്തിക്കരയാറ്റിൽ ചാടിയ ആദിച്ചനല്ലൂർ പ്ലാക്കാട് സെറ്റിൽമെന്റ് കോളനി സുരേഷ് ഭവനിൽ ഗോപാലകൃഷ്ണന്റെ മകൻ അഖിലിന്റെ (23, സച്ചു) മൃതദേഹം കിട്ടി . പൊലീസും ഫയർഫോഴ്സും സ്കൂബാ ഡൈവിംഗ് ടീമും നാട്ടുകാരും ചേർന്ന് രണ്ട് ദിവസമായി തിരച്ചിൽ നടത്തിവരികയായിരുന്നു. ഇന്നലെ രാവിലെ കാഞ്ഞിരംകടവ് ഭാഗത്താണ് മൃതദേഹം കിട്ടിയത്. വെള്ളിയാഴ്ച അഖിൽ ഉൾപ്പെട്ട നാലംഗ സംഘം ഇത്തിക്കര പാലത്തിന് സമീപമിരിക്കുമ്പോൾ പൊലീസ് പാഞ്ഞെത്തി. അതോടെ നാലുപേരും ഇത്തിക്കരയാറ്റിൽ ചാടുകയായിരുന്നു. മൂന്നുപേരും നീന്തി രക്ഷപ്പെട്ടു. അഖിലിനെ കാണാതായ വിവരം അറിയുന്നത് രാത്രിയിലാണ് . അമ്മ രമണി. അരുൺ, അശ്വതി സഹോദരങ്ങൾ .