അമ്മാൻ: ജോർദാൻ- ഇസ്രായേൽ അതിർത്തിയിൽ ചാവുകടലിൽ ഉണ്ടായ വെള്ളപ്പൊക്കത്തിൽ സ്കൂൾ വിദ്യാർത്ഥികൾ ഉൾപ്പെടെ 18 പേർ മരിച്ചു. സംഭവത്തിൽ 11 പേർക്ക്​ പരിക്കേറ്റു. ചാവുകടലിലേക്ക് വിദ്യാർത്ഥികളുമായി വിനോദയാത്രയ്ക്ക് വന്ന സ്​​കൂൾ ബസ്​ ഒലിച്ചുപോയതിനെ തുടർന്നാണ് അപകടം സംഭവിച്ചത്. മരിച്ചവരിൽ ഭൂരിഭാഗവും 14 വയസിൽ താഴെയുള്ള സ്​കൂൾ കുട്ടികളാണ്​. 37 കുട്ടികളും ഏഴ്​ അദ്ധ്യാപകരുമാണ് സ്​കൂൾ ബസിലുണ്ടായിരുന്നത്​. മരണസംഖ്യ ഇനിയും കൂടാൻ സാധ്യതയുണ്ടെന്ന്​ അധികൃതർ പറഞ്ഞു. ജോർദാന്റെ അപേക്ഷപ്രകാരം രക്ഷാപ്രവർത്തനത്തിനായി ഹെലികോപ്​റ്ററുകൾ അയച്ചിട്ടുണ്ടെന്ന്​ ഇസ്രായേൽ അധികൃതർ അറിയിച്ചു. പ്രധാനപ്പെട്ട വിനോദസഞ്ചാര കേന്ദ്രങ്ങളിലൊന്നാണ്​ ചാവുകടൽ. എന്നാൽ എപ്പോഴും വെള്ളപ്പൊക്കത്തിന് സാധ്യതയുള്ളതാണ്​ ഇവിടം.