തിരുവനന്തപുരം : ചക്കുളത്തുകാവ് ശ്രീ ഭഗവതി ക്ഷേത്രത്തിലെ പൊങ്കാല മഹോത്സവം നവംബർ 23ന് നടക്കും. രാവിലെ 9ന് ക്ഷേത്രകാര്യദർശി മണിക്കുട്ടൻ നമ്പൂതിരിയുടെ അദ്ധ്യക്ഷതയിൽ നടക്കുന്ന അദ്ധ്യാത്മിക സംഗമം മുഖ്യകാര്യദർശി രാധാകൃഷ്‌ണൻ നമ്പൂതിരി ഉദ്ഘാടനം ചെയ്യും. 10ന് പണ്ടാര അടുപ്പിൽ തീപകരും. പൊങ്കാല ഉദ്ഘാടനവും അന്നദാനമണ്ഡപ സമർപ്പണവും ഗോകുലം ഗ്രൂപ്പ് ചെയർമാൻ ഗോകുലം ഗോപാലൻ നിർവഹിക്കും. വൈകിട്ട് 5ന് നടക്കുന്ന സാംസ്‌കാരിക സമ്മേളനം ഡി.ജി.പി ലോക്‌നാഥ് ബഹ്റ ഉദ്ഘാടനം ചെയ്യും. കൊടിക്കുന്നിൽ സുരേഷ് എം.പി മുഖ്യാതിഥിയാകും. രമേശ് ഇളമൺ നമ്പൂതിരി പ്രഭാഷണം നടത്തും. മേഘാലയ സ്റ്റേറ്റ് അഡ്വൈസർ ഡോ.സി.വി. ആനന്ദ ബോസ് കാർത്തിക സ്‌തംഭത്തിൽ അഗ്നിപകരും. ജനൂപ് പുഷ്‌പാകരൻ, സുനിൽകുമാർ, മന്നാർ അബ്‌ദുൾ ലത്തീഫ്, ബാബു വലിയവീട്ടിൽ, ലാലി അലക്‌സ്, അജിത്ത് പിഷാരത്ത്, ഡി. വിജയകുമാർ, ജെയിംസ്ചുങ്കത്തിൽ എന്നിവർ പങ്കെടുക്കും. ക്ഷേത്രം അഡ്മിനിസ്ട്രേറ്റർ കെ.കെ. ഗോപാലകൃഷ്‌ണൻ നായർ, ഹരിക്കുട്ടൻ നമ്പൂതിരി, പി.ആർ.ഒ സുരേഷ് കാവുംഭാഗം, ഉത്സവകമ്മിറ്റി പ്രസിഡന്റ് കെ. സതീശ്കുമാർ, സെക്രട്ടറി സന്തോഷ് ഗോകുലം എന്നിവരും വാർത്താസമ്മേളനത്തിൽ പങ്കെടുത്തു.