പൂച്ചാക്കൽ : ജലഗതാഗത വകുപ്പിന്റെ വൈക്കം-എറണാകുളം അതിവേഗ എ.സി ബോട്ട് അടുക്കുന്ന ജെട്ടികളുടെയും ടിക്കറ്റ് ചാർജിന്റെയും കാര്യത്തിൽ അന്തിമ തീരുമാനമായി. വൈക്കത്ത് നിന്നും രാവിലെ 7.30ന് പുറപ്പെടുന്ന ബോട്ട് പെരുമ്പളം സൗത്ത്, പാണാവള്ളി, തേവര ഫെറി എന്നീ ജെട്ടികളിൽ അടുത്ത ശേഷം എറണാകുളം മെയിൻ ജെട്ടിയിൽ 9.30ന് എത്തും. വൈകിട്ട് 5.30നാണ് എറണാകുളത്ത് നിന്ന് യാത്ര തിരിക്കുന്നത്. സംസ്ഥാനത്ത് ഏറ്റവും വേഗതയേറിയ ‘വേഗ 120’ എന്ന അതിവേഗ എ.സി ബോട്ട് നാളെ മുതലാണ് സർവീസ് തുടങ്ങുന്നത്.

വിനോദസഞ്ചാരികൾക്കും യാത്രക്കാർക്കും ഒരുപോലെ പ്രയോജനപ്പെടുന്നതാണ് ഈ ബോട്ട് സർവീസ്. ശീതീകരിച്ച കാബിനിൽ 40 സീറ്റുകളും, സാധാരണ കാബിനിൽ 80 സീറ്റുകളുമാണ് സജ്ജീകരിച്ചിട്ടുള്ളത്. ബോട്ട് ഒരു മണിക്കൂർ പ്രവർത്തിക്കാൻ 35 ലിറ്റർ ഡീസൽ വേണം. 170 എച്ച്.പി.യുടെ രണ്ട് എൻജിനുകളാണ് ബോട്ടിൽ ഉള്ളത്. അപകടസാദ്ധ്യത കുറയ്ക്കാനുള്ള സംവിധാനവും ടി.വി., വൈ ഫൈ സംവിധാനങ്ങളും ബോട്ടിലുണ്ട്. കഫെറ്റേരിയയും രണ്ടു ശൗചാലയങ്ങളും അഗ്നിശമന സംവിധാനവും ഉണ്ടാകും. എക്കൽ അടിഞ്ഞ് ആഴം കുറവായതിനാലാണ് അരൂക്കുറ്റി ജെട്ടിയിൽ ബോട്ട് അടുപ്പിക്കാത്തത്.എക്കൽ ഡ്രഡ്ജ് ചെയ്ത് നീക്കിയശേഷം ഇവിടെ ബോട്ട് അടുപ്പിക്കുന്നതിനുള്ള നടപടി സ്വീകരിക്കുമെന്നാണ് അധികൃതർ അറിയിച്ചിട്ടുള്ളത്.

 ഒരു ട്രിപ്പ് രണ്ട് മണിക്കൂർ

ജെട്ടികളിൽ അടുപ്പിച്ച് യാത്രക്കാരെ ഇറക്കുകയും കയറ്റുകയും ചെയ്യുന്നത് അടക്കം രണ്ട് മണിക്കൂറാണ് ബോട്ടിന്റെ ഒരു ട്രിപ്പിന് നിശ്ചയിച്ച സമയപരിധി. പരമാവധി വേഗത മണിക്കൂറിൽ 25 കിലോമീറ്റർ . രാവിലെ 9.30ന് എറണാകുളത്ത് എത്തിയശേഷം വൈകിട്ട് വരെ അവിടെ സർവീസ് നടത്തും. വൈക്കം-എറണാകുളം അതിവേഗ ബോട്ട് സർവീസിനെ ബന്ധിപ്പിച്ച് നാല് കണക്‌ഷൻ ബോട്ട് സർവീസുകളും ഉണ്ട്. വൈക്കത്ത്‌ നിന്ന് തവണക്കടവിലേക്കും തേവര ഫെറിയിൽ നിന്ന് കാക്കനാട്ടേക്കും വൈറ്റിലയ്ക്കും പെരുമ്പളം സൗത്തിൽ നിന്ന് പൂത്തോട്ടയ്ക്കുമാണ് കണക്ഷൻ സർവീസ്.

 ടിക്കറ്റ് നിരക്ക്

20, 30, 40 എന്നിങ്ങനെയാണ് ടിക്കറ്റ് നിരക്ക്. ശീതീകരിച്ച കാബിനിൽ ഇതിന്റെ ഇരട്ടിയാണ് ടിക്കറ്റ് നിരക്ക്. വൈക്കത്തു നിന്നും ഓരോ ജെട്ടിയിലേക്കുമുള്ള ടിക്കറ്റ് നിരക്ക് ഇങ്ങനെ (ബ്രാക്കറ്റിൽ എ.സി നിരക്ക് ) : പെരുമ്പളം സൗത്ത്,പാണാവള്ളി - 20രൂപ (20) , തേവര ഫെറി - 30രൂപ (30), എറണാകുളം - 40 രൂപ (40).