ആലുവ: സ്വന്തമായി ഭൂമിയുണ്ടായിട്ടും അടച്ചുറപ്പില്ലാത്ത കൂരകളിലും വാടകവീടുകളിലും കഴിയേണ്ടിവരുന്ന വിധവകളായ അമ്മമാർക്കും അവരുടെ മക്കൾക്കും സുരക്ഷിത ഭവനമൊരുക്കുക എന്ന ലക്ഷ്യത്തോടെ അൻവർ സാദത്ത് എം.എൽ.എ നടപ്പിലാക്കിയ 'അമ്മക്കിളിക്കൂട്' ഭവന നിർമ്മാണ പദ്ധതിയിൽപ്പെടുത്തി നിർമ്മിച്ച 17 -ാമത്തെ വീടിന്റെ താക്കോൽദാനം നടന്നു.

കീഴ്മാട് പഞ്ചായത്ത് 12-ാം വാർഡിൽ രണ്ടുകുട്ടികളുള്ള വിജയമ്മ എന്ന വിധവയ്ക്കായി നിർമ്മിച്ച ഭവനത്തിന്റെ താക്കോൽദാനം സ്‌പോൺസർ അസറ്റ് ഹോം എം.ഡി. സുനിൽ നിർവഹിച്ചു. അൻവർ സാദത്ത് എം.എൽ.എ അദ്ധ്യക്ഷത വഹിച്ചു. പഞ്ചായത്ത് പ്രസിഡന്റ് കെ.എ. രമേശ്, വാഴക്കുളം ബ്ലോക്ക് പഞ്ചായത്ത് പ്രസിഡന്റ് മുംതാസ് , മെമ്പർ പി.കെ. രമേശൻ, അസ്സറ്റ് ഹോംസ് ഡയറക്ടർ മോഹനൻ, തോപ്പിൽ അബു, ലൈസ സെബാസ്റ്റ്യൻ, അനുകുട്ടൻ, സേവ്യർ, ബീന ബാബു എന്നിവർ സംസാരിച്ചു.

510 ചതുരശ്ര അടിയിലാണ് ഭവനങ്ങൾ നിർമ്മിക്കുന്നത്. 16 ഭവനങ്ങളുടെ നിർമ്മാണം ശ്രീമൂലനഗരം, നെടുമ്പാശേരി, ചെങ്ങമനാട്, ചൂർണിക്കര, കീഴ്മാട്, എടത്തല, കാഞ്ഞൂർ എന്നീ പഞ്ചായത്തുകളിൽ പുരോഗമിക്കുന്നു.