കാസർകോട്: ശബരിമല സംരക്ഷണ രഥയാത്ര പത്തനംതിട്ടയിൽ സമാപിക്കുന്നതോടെ ചരിത്രപരമായ മാറ്റങ്ങൾക്ക് ഈ നാട് സാക്ഷ്യം വഹിക്കാൻ പോവുകയാണെന്ന് ബി.ഡി.ജെ.എസ് സംസ്ഥാന പ്രസിഡന്റ് തുഷാർ വെള്ളാപ്പള്ളി പറ‌‌‌ഞ്ഞു. എൻ.ഡി.എയുടെ നേതൃത്വത്തിലുള്ള ശബരിമല സംരക്ഷണ രഥയാത്രയുടെ ഉദ്‌ഘാടനച്ചടങ്ങിൽ പ്രസംഗിക്കുകയായിരുന്നു അദ്ദേഹം. ജാതി മത ചിന്തകൾ തീണ്ടാതെ വിശ്വാസികൾ ദർശനം നടത്തുന്ന ശബരിമല മതേതരത്വത്തിന്റെ ഉദാത്തമായ പ്രതീകമാണ്. രഥയാത്ര ഹിന്ദുവിന്റെ വിശ്വാസം സംരക്ഷിക്കാനുള്ള യാത്രയാണെന്ന വ്യാഖ്യാനം തെറ്റിദ്ധരിപ്പിക്കുന്നതാണ്. എല്ലാ വിഭാഗം ജനങ്ങളും ദർശനത്തിനെത്തുന്ന പവിത്രമായ ഇടമാണ് ശബരിമല. അയ്യപ്പന്റെ പൂങ്കാവനത്തിൽ യുവതികൾക്കു വിലക്ക് പാടില്ലെന്ന സുപ്രീംകോടതി വിധി വന്നപ്പോൾ അത് എത്രയും പെട്ടെന്നു നടപ്പാക്കാനായിരുന്നു പിണറായി സർക്കാരിന്റെ തീരുമാനം. സർക്കാരിന്റെ ഈ അനാവശ്യ തിടുക്കമാണ് എല്ലാ പ്രശ്നങ്ങൾക്കും കാരണമായത്. ആരോടും കൂടിയാലോചന നടത്താൻ പോലും മുതിരാതെ ഇത്രയും തിടുക്കത്തിൽ വിധി നടപ്പാക്കാൻ ശ്രമിച്ചത് എന്തിനായിരുന്നു ? സുപ്രീംകോടതിയിലെ അഞ്ചംഗ ബെഞ്ചിന്റേതാണ് ഈ വിധി. നേരത്തേ ഒൻപതംഗ ബെഞ്ച് പുറപ്പെടുവിച്ച വിധികൾ പലതും നടപ്പാക്കാതെ കിടക്കുകയാണ്. സംവരണക്കേസിലും സഭാ കേസിലും ഉൾപ്പെടെ വിധി മറികടക്കാൻ ശ്രമിച്ച സർക്കാർ ശബരിമല വിഷയത്തിൽ മാത്രം വേഗത്തിൽ വിധി നടപ്പിലാക്കണമെന്ന് പറയുന്നതിനു പിന്നിൽ രാഷ്ട്രീയ ഗൂഢാലോചന തന്നെയാണുള്ളത്. ഹിന്ദു വിഭാഗത്തെ പല കഷണങ്ങളായി മുറിക്കാൻ ലക്ഷ്യം വച്ചുള്ള ഈ ഗൂഢാലോചനയെ ഒറ്റക്കെട്ടായി ചെറുത്തു തോല്പിക്കേണ്ടതുണ്ട്. സർക്കാർ ആനുകൂല്യങ്ങൾ നൽകുന്നതിൽ പോലും ജാതിയും മതവും നോക്കുന്ന പിണറായി സർക്കാരിന് രഥയാത്ര സമാപിക്കുമ്പോഴെങ്കിലും ബോധോദയം ഉണ്ടാകട്ടെയെന്നും തുഷാർ പറഞ്ഞു.