രാമപുരം- കൊണ്ടാട്-കൂഴമല-ഉഴവൂർ റോഡ് തകർന്നു

പാലാ :സൂക്ഷിക്കണേ...! എങ്കിൽ ദു:ഖിക്കേണ്ട. രാമപുരം കൊണ്ടാട് - കൂഴമല വഴിയെത്തുന്ന യാത്രക്കാരോട് നാട്ടുകാർക്ക് അത്രമേ പറയാനുള്ളൂ. റോഡ് തകർന്നു,പോരാഞ്ഞ് നെല്ലിക്കോട്ടിൽ ഭാഗത്തെ കലുങ്കിൽ അപകടം വാ പിളർക്കുന്നു. കാര്യം വ്യക്തമായല്ലോ!. രാമപുരം- കൊണ്ടാട്-കൂഴമല-ഉഴവൂർ റോഡിനും കലുങ്കിനും മൂന്നര പതിറ്റാണ്ട് പഴക്കമുണ്ട്. ഇനി തകരാൻ ബാക്കിയൊന്നുമില്ലെന്നാണ് നാട്ടുകാരുടെ പക്ഷം. കലുങ്ക് നിലംപൊത്തിയാൽ വലിയ അപകടം കാണേണ്ടിവരും. കമ്പികൾ ദ്രവിച്ചു. അടിത്തട്ടിലെ കല്ലുകൾ ഇളകി. അപകടം വരാൻ പിന്നെന്തുവേണമെന്നായി ചോദ്യം.

അത് ഒന്നുമായില്ല

ഒന്ന് ടാർ ചെയ്തു. അതാകട്ടെ 1983 ൽ. പിന്നെ കെ.എം. മാണി എം.എൽ.എ ഇടപെട്ടപ്പോൾ പി.ഡബ്ലി.യു.ഡിയുടെ വക അല്ലറചില്ലറ അറ്റകുറ്റപ്പണികൾ. പക്ഷേ ഇതുകൊണ്ടായില്ല. പി.ഡബ്ലി.യു.ഡി കടുത്തുരുത്തി സെക്ഷൻ അധികൃതർ റീ-ടാറിംഗിനായി 26 ലക്ഷം രൂപയുടെ എസ്റ്റിമേറ്റ് എടുത്തു. പിന്നെ നടപടികൾ ഒരിഞ്ച് മുന്നോട്ടുപോയില്ല. ഇനി മന്ത്രിക്കൊരു നിവേദനം. അല്ലാതെ രക്ഷയില്ലെന്നാണ് നാട്ടുകാരുടെ പക്ഷം.