തിരുവനന്തപുരം: സംസ്ഥാനത്ത് ചിലയിടങ്ങളിൽ ഇന്ന് ശക്തമായ മഴയുണ്ടാകുമെന്ന് കാലാവസ്ഥ നിരീക്ഷണ കേന്ദ്രത്തിന്റെ മുന്നറിയിപ്പ്. മൂന്ന് നാല് തീയതികളിൽ കനത്ത മഴയ്ക്കുള്ള മുന്നറിയിപ്പുണ്ട്. ഇതിനെ തുടർന്ന് വയനാട്, മലപ്പുറം, ഇടുക്കി, പത്തനംതിട്ട ജില്ലകളിൽ യെല്ലോ അലർട്ട് പ്രഖ്യാപിച്ചിട്ടുണ്ട്. ഏഴ് മുതൽ 11 സെന്റി മീറ്റർ മഴ ലഭിച്ചേക്കാം.

ഒക്ടോബറിൽ എത്തുമെന്ന് വിലയിരുത്തപ്പെട്ടിരുന്ന തുലാവർഷം നവംബർ ആദ്യ വാരത്തിന് ശേഷം ശക്തമായേക്കും. നിലവിൽ തമിഴ്നാട്ടിൽ തുലാമഴ എത്തിക്കഴിഞ്ഞു. തമിഴ്നാടിന്റെ കിഴക്കൻ മേഖലയിൽ ശക്തമായിരിക്കുന്ന തുലാമഴ നവംബർ രണ്ടാം വാരത്തോടെ കേരളത്തിലേക്ക് എത്തുമെന്നാണ് കാലാവസ്ഥാ വകുപ്പിന്റെ കണക്കു കൂട്ടൽ.