അപകടങ്ങളും വീഴ്ചകളും പറ്റുമ്പോഴുണ്ടാകുന്ന മുറിവുകളെല്ലാം പ്രശ്നക്കാരാണോ? രക്തം പൊടിയുന്നതും ചതവ് സംഭവിക്കുന്നതും പൊട്ടലുണ്ടാകുന്നതുമൊക്കെയായി പല തരത്തിലും മുറിവുകൾ പറ്റാം. മുറിവുകളുണ്ടായാൽ എപ്പോഴൊക്കെയാണ് അടിയന്തര വൈദ്യസഹായം തേടേണ്ടത് ? ഏതൊക്കെ മുറിവുകളെയാണ് പേടിക്കേണ്ടത്?

എല്ലാത്തിനുമുള്ള ഉത്തരം ഇനി പറയാം
മുറിവുകൾ പൊതുവെ രണ്ടുതരത്തിലുള്ളതാണ്; തുറന്ന മുറിവുകളും അടഞ്ഞ മുറിവുകളും. ചർമ്മം പൊട്ടിയ മുറിവുകളാണ് തുറന്ന മുറിവുകൾ. ചർമ്മം പൊട്ടാത്തവ അടഞ്ഞ മുറിവുകളും. ചർമ്മം ശരീരത്തിനെ ഒരു കവചം പോലെ പൊതിഞ്ഞുരക്ഷിക്കുന്നതുകൊണ്ട്, അടഞ്ഞ മുറിവുകൾക്ക് പൊതുവെ പ്രശ്നങ്ങൾ കുറവായിരിക്കും. പക്ഷേ ചർമ്മം പൊട്ടുന്നതുകൊണ്ട് തുറന്ന മുറിവുകളിൽനിന്ന് രക്തസ്രാവമുണ്ടാവാനും രോഗാണുബാധയുണ്ടായി പഴുക്കാനും സാദ്ധ്യതയുണ്ട്. അതിനാൽ തുറന്ന മുറിവുകളുടെ പ്രഥമശുശ്രൂഷ കൂടുതൽ ശ്രദ്ധിക്കേണ്ടതാണ്. തുറന്ന മുറിവുകളിൽ ചർമ്മം ഉരഞ്ഞുപൊട്ടുന്നതിനാൽ രക്തം പൊടിയുകയോ അല്പം രക്തം പോവുകയോ ചെയ്യും. നീറുന്ന വേദനയുണ്ടാവും. പിന്നീട് രോഗാണുബാധയും ഉണ്ടാവും.

ശരീരത്തിലേക്ക് ഭാരമേറിയ വസ്തുക്കൾ വന്നുവീഴുകയോ തട്ടുകയോ അടി കിട്ടുകയോ ചെയ്യുകയാണെങ്കിൽ ചതവുകളാണുണ്ടാവുക. കല്ലിലോ മറ്റു വസ്തുക്കളിലോ തട്ടിവീഴുക, റോഡപകടങ്ങൾ, സ്‌പോർട്സ്, ബോക്സിംഗ് എന്നിവയ്ക്ക് ഇടയിൽ സംഭവിക്കുന്ന അപകടങ്ങൾ എന്നിവയിലെല്ലാം ചതവുകൾ സംഭവിക്കാം. ചർമ്മത്തിനു താഴെ രക്തസ്രാവവും ചർമ്മത്തിന് പുറത്ത് ചിലപ്പോൾ കരിനീലനിറത്തിലുള്ള പാടും കാണാം. പുറത്ത് ചതവുണ്ടെങ്കിൽ മുറിവ് നിസാരമായിക്കരുതി അവഗണിക്കരുത്. ശരീരത്തിനകത്ത് ചിലപ്പോൾ എല്ല് പൊട്ടിയിട്ടുണ്ടാവാം. അതുപോലെ തലയ്ക്കു ചതവുള്ള ഒരു രോഗിക്ക് ചിലപ്പോൾ തലയോട്ടി പൊട്ടി തലച്ചോറിൽ ക്ഷതം സംഭവിച്ചിരിക്കാം. അതായത് തലയ്ക്ക് ചതവ് മാത്രമേയുള്ളൂ എന്ന് കരുതി അവഗണിച്ചാൽ രോഗി ചിലപ്പോൾ ഗുരുതരാവസ്ഥയിലെത്തിയെന്നും വാരാം.

യന്ത്രഭാഗങ്ങൾകൊണ്ടോ പരുപരുത്ത സ്ഥലത്ത് ശരീരം ഉരയുന്നതുകൊണ്ടോ മൃഗങ്ങൾ മാന്തുന്നതുകൊണ്ടോ ഉണ്ടാകുന്ന മുറിവുകളെയും ഗുരുതമായി തന്നെ കാണണം. ഇതിൽ ചർമ്മത്തോടൊപ്പം ചർമ്മത്തിനടിയിലെ കോശങ്ങളും മാംസപേശികളും രക്തക്കുഴലുകളും മുറിനാനിടയുണ്ട്. മുറിവിന്റെ അരികുകൾ വികൃതവും ചതഞ്ഞതുമാവാം. ഇത്തരം മുറിവുകൾ വേഗം പഴുക്കാനിടയുണ്ട്.

കൂർത്ത ആയുധങ്ങൾ തുളച്ചുകയറി ഉണ്ടാവുന്ന മുറിവുകൾക്കും അടിയന്തര വൈദ്യ സഹായം തേടണം. ഉദാഹരണമായി കത്തി, കുന്തം, ശൂലം കട്ടപ്പാര, കത്രിക, കമ്പി തുടങ്ങി മുനയുള്ള ആയുധങ്ങൾ കൊണ്ടുള്ള മുറിവുകൾ. ഇതിനു പുറമെ നഖം, സൂചി, പല്ല്, വെടിയുണ്ട വളർത്തുമൃഗങ്ങളുടെ കടി എന്നിവ കൊണ്ടും ഇത്തരം മുറിവുകൾ ഉണ്ടാവാം. ഇവ പുറമെ ചെറുതായി തോന്നാമെങ്കിലും ചർമ്മത്തിനുള്ളിൽ ആഴം കൂടുതലായിരിക്കും. വേദന, നീർക്കെട്ട്,ചതവ്, രക്തസ്രാവം എന്നിവയുണ്ടാവാം. പുറത്തുനിന്ന് ചെളിയും രോഗാണുക്കളും ആയുധത്തോടൊപ്പം ശരീരത്തിൽ പ്രവേശിച്ചാൽ രോഗങ്ങളും പഴുപ്പുംഉണ്ടാവും.

മുറിവിനുള്ള പ്രാഥമിക ശുശ്രൂഷ
മുറിവ് കഴുകി വൃത്തിയാക്കുക എന്നതാണ് ആദ്യ ശുശ്രുഷ. ഒട്ടി പ്പിടിച്ച ചെളിയും അന്യപദാർത്ഥങ്ങളും കളയാനായി മുറിവിനു മുകളിൽ ചെറുതായി വെള്ളമൊഴിക്കുക. മുറിവിനു മുകളിൽ തറച്ചുനിൽക്കുന്ന അന്യവസ്തുക്കൾ (ചില്ലുകഷ്ണം, മണൽ,കല്ലിൻ കഷ്ണം തുടങ്ങിയവ) ഒരിക്കലും വലിച്ചെടുത്തു മാറ്റാൻ ശ്രമിക്കരുത്. അത് ഡോക്ടർ ചെയ്യുന്നതായിരിക്കും നല്ലത്. ഇങ്ങനെ ചെയ്താൽ ചിലപ്പോൾ നിർത്താതെ രക്തസ്രാവമുണ്ടാവാനിടയുണ്ട്. മുറിവ് കഴുകി വൃത്തിയാക്കിയശേഷം രക്തസ്രാവമുണ്ടോ എന്ന് ശ്രദ്ധിക്കുക. രക്തസ്രാവമുണ്ടെങ്കിൽ മുറിവിനു മുകളിൽ വൃത്തിയുള്ള തുണിവച്ചമർത്തി രക്തസ്രാവം നിർത്താൻ ശ്രമിക്കുക. രക്തം നിന്നു കഴിഞ്ഞാൽ മുറിവു വൃത്തിയാക്കി തുടച്ച് രോഗാണുനാശകമായ ഏതെങ്കിലും ക്രീം പുരട്ടുക. വൃത്തിയുള്ള തുണിയോ വച്ചശേഷം വൃത്തിയുള്ള തുണിയോ ബാൻഡേജോ കൊണ്ട് കെട്ടുക.

ചതവും അടഞ്ഞ മുറിവുകളുമാണെങ്കിൽ ബാൻഡേജ് കെട്ടേണ്ടതില്ല. ചതഞ്ഞഭാഗം ഉയർത്തിവയ്ക്കുക. തണുത്ത വെള്ളത്തിൽ മുക്കിപ്പിഴിഞ്ഞ വൃത്തിയുള്ള ഒരു തുണി ചതവിനു മുകളിൽ അല്പനേരം വയ്ക്കാം. വേദന സംഹാരി മരുന്നുകൾ കൊടുക്കാം. ചതഞ്ഞ ഭാഗത്ത് രക്തം കല്ലിച്ചുകിടക്കുന്നത് സൂചികൊണ്ട് കുത്തിക്കളയാൻ ശ്രമിക്കരുത്.