കൊച്ചി: ശബരിമലയിൽ കാണിക്ക ഇടരുതെന്ന് പറഞ്ഞിട്ടില്ലെന്ന് ബി.ജെ.പി സംസ്ഥാന അദ്ധ്യക്ഷൻ പി.എസ് ശ്രീധരൻപിള്ള. ദേവസ്വം ബോർഡിനെ വിമർശിച്ച് കൊണ്ട് ദേവസ്വം ബോ‌ർഡിലെ അമ്പലങ്ങളിൽ കാണിക്കയിടരുതെന്ന സുരേഷ് ഗോപിയുടെ വീഡിയോ സോഷ്യൽ മീഡിയയിൽ പ്രചകിച്ചിരുന്നു. ഈ സാഹചര്യത്തിലാണ് സംഭവത്തിൽ വിശദീകരണവുമായി ശ്രീധരൻ പിള്ള രംഗത്തെത്തിയത്. സുരേഷ് ഗോപി അങ്ങനെ പറഞ്ഞെങ്കിൽ അത് അദ്ദേഹത്തിന്റെ വ്യക്തിപരമായ അഭിപ്രായമാണെന്നും ശബരിമല വിഷയത്തിൽ അങ്ങനെ പലരും വ്യക്തിപരമായ അഭിപ്രായം പറയുന്നുണ്ടെന്നും ശ്രീധരൻ പിള്ള പറഞ്ഞു.

ക്ഷേത്രങ്ങളിൽ സാമ്പത്തിക അച്ചടക്കം ഒരു വർഷം പാലിച്ചാൽ ഭക്തർ എന്താണെന്ന് സർക്കാരിനും ദേവസ്വം ബോർഡിനു മനസിലാവുമെന്നായിരുന്നു വീഡിയോയിൽ സുരേഷ് ഗോപി പറയുന്നത്. പിന്നെ ഒരു ദേവസ്വം മന്ത്രിയും അഹങ്കരിക്കില്ലെന്നും ദൈവത്തിന് നൽകാനുള്ളത് വീട്ടിൽ സൂക്ഷിക്കുന്ന കാണിക്ക വഞ്ചിയിൽ നിക്ഷേപിക്കാമെന്നും ഈ വിഡിയോയിൽ സുരേഷ്ഗോപി പറയുന്നുണ്ട്.