ഇൻഡ‌ോർ: ശബരിമലയിലെ യുവതി പ്രവേശനവുമായി ബന്ധപ്പെട്ട് വർഗീയ ധ്രുവീകരണത്തിനാണ് ബി.ജെ.പി ശ്രമിക്കുന്നതെന്ന് നടിയും കോൺഗ്രസ് പാർട്ടി വക്താവുമായ ഖുശ്ബു. ദക്ഷിണേന്ത്യയിൽ സ്ഥാനം കണ്ടെത്താനാണ് ബി.ജെ.പി ശ്രമിക്കുന്നതെന്നും എന്നാൽ അവരുടെ മുന്നിൽ വാതിൽ അടച്ചിരിക്കുകയാണെന്നതാണ് യാഥാർത്ഥ്യമെന്നും ഖുശ്ബു പറഞ്ഞു. മദ്ധ്യപ്രദേശിൽ തിരഞ്ഞെടുപ്പ് പ്രചരണത്തിൽ സംസാരിക്കുന്നതിനിടെയാണ് അവർ ഇക്കാര്യം വ്യക്തമാക്കിയത്.

ശബരിമലയിൽ സ്ത്രീകളെ പ്രവേശിപ്പിക്കുന്നതുമായി ബന്ധപ്പെട്ട് കോൺഗ്രസിന്റെ കേന്ദ്ര- സംസ്ഥാന നേതൃത്വങ്ങൾക്കിടയിൽ ആശയക്കുഴപ്പം ഇല്ലെന്നും ഖുശ്ബു വ്യക്തമാക്കി. ''ലിംഗത്തിന്റെ അടിസ്ഥാനത്തിൽ പുരുഷന്മാരെയും സ്ത്രീകളേയും വേർതിരിക്കുന്നതിന് കോൺഗ്രസ് എതിരാണ്. എന്നാൽ ആചാരങ്ങളും വിശ്വാസങ്ങളും ഓരോ മതത്തിനും വ്യത്യസ്ഥമാണെന്ന് ഞങ്ങൾക്ക് അറിയാവുന്നതാണ്. കേരളത്തിലെ സ്ത്രീകൾ അടക്കമുള്ളവർ വർഷങ്ങളായുള്ള ആചാരത്തെയാണ് പിന്തുണയ്ക്കുന്നത്. ശബരിമല വിഷയത്തിൽ പരസ്പരമുള്ള കാഴ്ചപ്പാടുകൾ മനസിലാക്കാൻ സമയമെടുക്കും"- ഖുശ്ബു പറഞ്ഞു.