ലണ്ടൻ: അഴുക്കുപുരണ്ട് നാറിയ ഷൂസും സോക്സും പട്ടിപോലും എടുക്കില്ലെന്നാണ് വയ്പ്പ്.എന്നാൽ ലണ്ടൻകാരി റോക്സി സ്‌കെയിസ് ഇവകൊണ്ട് ഒരുവർഷം ഉണ്ടാക്കുന്നത് 94 ലക്ഷം രൂപയാണ്. വിശ്വസിക്കാനാവുന്നില്ലെങ്കിലും സംഗതി സത്യമാണ്. സോഷ്യൽ മീഡിയയിലൂടെ ഉപയോഗിച്ച സോക്സുകളും ഷൂസുകളും വിറ്റാണ് റോക്സി ഇത്രയും വരുമാനം ഉണ്ടാക്കുന്നത്.

ഉപയോഗിച്ച് അഴുക്കുപിടിച്ച സോക്സുകളുടെയും ഷൂസുകളുടെയും ചിത്രം വെറുതേ ഒരു രസത്തിനാണ് റോക്സി ഇൻസ്റ്റാഗ്രാമിൽ പോസ്റ്റുചെയ്തത്. ഒപ്പം മനോഹരമായ തന്റെ പാദത്തിന്റെ ചിത്രവും.ആൾക്കാരുടെ തെറിവിളി പ്രതീക്ഷിച്ച റോക്സിക്ക് ലഭിച്ചത് അഭിനന്ദനങ്ങളും അന്വേഷണങ്ങളുമാണ്. അതോടെ കളം മാറ്റിച്ചവിട്ടാൻ തന്നെ തീരുമാനിച്ചു. ആവശ്യമുള്ളവർക്ക് സോക്സും ഷൂസും വിൽക്കുമെന്ന് അറിയിപ്പും ചിത്രങ്ങൾക്കൊപ്പം പോസ്റ്റുചെയ്തു. സംഗതി ഏറ്റു. ആവശ്യക്കാർ ഇടിച്ചുകയറി. സുന്ദരമായ കാലുകളുടെ മണം ആസ്വദിക്കാനാണ് ചിലർ ഷൂസും സോക്സും ഓർഡർ ചെയ്തത്.

മറ്റുചിലർ ധരിച്ചുനടക്കാനാണ് വാങ്ങിയത്. ഒരുജോടി സോക്സിന് ആയിരത്തി എണ്ണൂറുരൂപയാണ് വില. ഷൂസിന് ഇരുപതിനായിരം രൂപയും. നാലുവർഷം മുമ്പ് ഈ ബിസിനസ് തുടങ്ങിയപ്പോൾ വിരലിലെണ്ണാവുന്നവർ മാത്രമായിരുന്നു ഫോളവേഴ്സ്. ഇപ്പോൾ ലക്ഷങ്ങളാണ് . ഓരോമാസവും എണ്ണം കൂടിക്കൊണ്ടിരിക്കുന്നു. ബിസിനസ് പച്ചപിടിച്ചതോടെ ദിവസത്തിൽ കൂടുതൽ സമയവും പാദസംരക്ഷണത്തിനായാണ് റോക്സി ചെലവിടുന്നത്.കുടുംബാംഗങ്ങളുടെ പൂർണ പിന്തുണയും ഇതിനുണ്ട്.

തുടക്കത്തിൽ തന്റെ കാലുകൾ മാത്രമാണ് റോക്സി പ്രദർശിപ്പിച്ചത്.രൂപം കണ്ടാൽ ബിസിനസ് പൊളിയുമോ എന്നായിരുന്നു പേടി. കുറച്ചുനാൾ കഴിഞ്ഞപ്പോൾ ഫുൾസൈസ് ഫോട്ടോ തന്നെ പ്രസിദ്ധീകരിച്ചു. അതോടെയാണ് ആൾക്കാർ ഇടിച്ചുകയറിയത്. സോക്സും ഷൂവും വാങ്ങുന്നതിനൊപ്പം പാദങ്ങൾ സുന്ദരമായി സംരക്ഷിക്കാനുള്ള പൊടികൈകൾ അറിയാനും ചിലർക്ക് താത്പര്യമുണ്ട്.റോക്സി ആരെയും നിരാശപ്പെടുത്താറില്ല.
പക്ഷേ, ഉപദേശം വേണമെങ്കിൽ കാശ് കൂടുതൽ കൊടുക്കണമെന്നുമാത്രം.