ഹൈദരാബാദ്​: ആന്ധ്രാപ്രദേശിലെ കുർനൂളിൽ വിവാഹാഭ്യർത്ഥന നിരസിച്ച ഒമ്പതാംക്ലാസ്​ വിദ്യാർത്ഥിയുടെ കഴുത്ത്​ മുറിച്ച ശേഷം അദ്ധ്യാപകൻ ആത്മഹത്യക്ക് ശ്രമിച്ചു. കുർനൂൾ ജില്ലയിലെ ബൻഗാരപേറ്റ റോക്ക്​വെൽ ഹൈസ്​കൂളിൽ ഹിന്ദി അധ്യാപകനായ ശങ്കറാണ്​ (30) പെൺകുട്ടിയെ കൊലപ്പെടുത്താൻ ശ്രമിച്ചത്​. ഇന്ന് രാവിലെ ഒമ്പതുമണിയോടെയാണ് നാടിനെ നടുക്കിയ സംഭവം. അച്ഛനും അമ്മയും പുറത്ത് പോയ സമയത്ത് പെൺകുട്ടിയുടെ വീട്ടിലെത്തിയ അദ്ധ്യാപകൻ ​ബ്ലേഡ്​ കൊണ്ട്​ പെൺകുട്ടിയുടെ കഴുത്ത്​ മുറിക്കുകയായിരുന്നു. ആശുപത്രിയിൽ പ്രവേശിപ്പിച്ച പെൺകുട്ടിയുടെ നില ഗുരുതരമാണ്​.

നിലവിളി കേട്ട് എത്തിയ നാട്ടുകാരാണ് പെൺകുട്ടിയെ ആശുപത്രിയിൽ എത്തിച്ചത്. സംഭവത്തിനു ശേഷം ശങ്കറും കഴുത്ത്​ മുറിച്ച്​ ആത്മഹത്യക്ക്​ ശ്രമിച്ചു. നാട്ടുകാർ ശങ്കറിനെ പിടികൂടി മർദ്ദിക്കുകയും ചെയ്തു. പൊലീസ്​ എത്തിയാണ്​ ഇയാളെ ആശുപത്രിയിൽ എത്തിച്ചത്​. ​ അദ്ധ്യാപകൻ മോശമായി പെരുമാറിയെന്നും പ്രണയാഭ്യർത്ഥന നടത്തിയെന്നും പെൺകുട്ടി നേരത്തെ മാതാവിനെ അറിയിച്ചിരുന്നു. പെൺകുട്ടിയെ ശല്യപ്പെടുത്തരുതെന്ന് അദ്ധ്യാപകനെ താക്കീത്​ ചെയ്തിരുന്നതായും കുടുംബാംഗങ്ങൾ പറഞ്ഞു. സ്കൂളിൽ താത്കാലികമായി ജോലി നോക്കുകയായിരുന്നു ശങ്കർ. സംഭവത്തിൽ ശങ്കറിനെ സസ്​പെൻഡ്​ ചെയ്​തതായും അന്വേഷണത്തിന്​ ഉത്തരവിട്ടതായും ആന്ധ്രപ്രദേശ്​ വിദ്യാഭ്യാസ വകുപ്പ്​ മന്ത്രി ശ്രീനിവാസ് അറിയിച്ചു.