തിരുവനന്തപുരം: അണ്ടർ 19 ചലഞ്ചർ ട്രോഫിക്കുള്ള ഇന്ത്യ ഗ്രീൻ ടീമിലേക്ക് കേരളത്തിന്റെ വത്സൽ ഗോവിന്ദിനെ തെരഞ്ഞെടുത്തു. ഓൾ റൗണ്ടറായ വത്സൽ ഗോവിന്ദ് നിലവിൽ കേരള അണ്ടർ 19 ടീം ക്യാപ്‌ടനാണ്.

ചാലക്കുടി സ്വദേശിയായ വത്സൽ ഗോവിന്ദ് തൃശ്ശൂർ കേരള വർമ്മ കോളേജിലെ ഒന്നാം വർഷ ബി.എ ഇംഗ്ലീഷ് ബിരുദ വിദ്യാർത്ഥിയാണ്. നേരത്ത, വിജയ് മെർച്ചന്റ് ട്രോഫി ടൂർണമെന്റിൽ അണ്ടർ 16 ഡൽഹി ടീമിനെ പ്രതിനിധീകരിച്ചിട്ടുണ്ട്. 2017 മുതൽ കേരളത്തിന് വേണ്ടി കളിച്ചു തുടങ്ങി. ഡൽഹിയിൽ ഉഷ ഇലക്ട്രിക്കൽസിൽ ഉദ്യോഗസ്ഥനായ ഗോവിന്ദ് കനകന്റെയും റൂമാ ഗോവിന്ദ് ശർമയുടെയും മകനാണ്.

ഇന്ത്യ ബ്ളൂ, ഇന്ത്യ റെഡ്, ഇന്ത്യ ഗ്രീൻ, ഇന്ത്യ യെല്ലോ എന്നീ 4 ടീമുകളാണ് ചലഞ്ചർ ട്രോഫിയിൽ കളിക്കുക. ടൂർണമെന്റ് ഈ മാസം 10 മുതൽ 16 വരെ ലക്നൗവിൽ നടക്കും.