ന്യൂഡൽഹി : ഏറ്റവും മോശമായ അന്തരീക്ഷ വായുവുള്ള ലോകനഗരമെന്ന കുപ്രസിദ്ധിയാർജ്ജിച്ചിരിക്കുകയാണ് ഡൽഹി. നിയന്ത്രണമെല്ലാം കാറ്റിൽ പറത്തി പടക്കങ്ങൾ പൊട്ടിച്ച ദീപാവലി പിറ്റേന്നാണ് വായു മലിനീകരണത്തിൽ രാജ്യതലസ്ഥാനം ‘ഒന്നാമതായത്'. ലോകനഗരങ്ങളുടെ വായു നിലവാരം നിരീക്ഷിക്കുന്ന എയർവിഷ്വൽ എന്ന രാജ്യാന്തര സ്ഥാപനത്തിന്റേതാണ് റിപ്പോർട്ട്. എന്നാൽ ഇന്നലെ നടത്തിയ പരിശോധനയിൽ സ്ഥിതി മെച്ചപ്പെട്ടതിനാൽ ഡൽഹി മൂന്നാം സ്ഥാനത്തേക്ക് മാറി. ധാക്ക ഒന്നും ലാഹോർ രണ്ടും സ്ഥാനത്തെത്തി.

വ്യാഴാഴ്ച രാവിലെ 4.30ന് നഗരത്തിലെ അന്തരീക്ഷ വായു നിലവാര സൂചിക (എയർ‍ ക്വാളിറ്റി ഇൻഡക്സ് –എക്യുഐ) 980 ആയപ്പോഴാണ് ഏറ്റവും മോശം വായു എന്ന നിലയിലെത്തിയത്. അതായത്, വായു ഏറ്റവും മോശമായ ബെയ്ജിംഗ് നഗരത്തെക്കാൾ 10 മടങ്ങ് അധികം. ചില മേഖലകളിൽ എക്യുഐ ആയിരത്തിനു മുകളിലെത്തി. 0–50 എക്യുഐ ആണ് സുരക്ഷിത നിലവാരം.