ന്യൂഡൽഹി: ഡൽഹി അന്താരാഷ്ട്ര വിമാനത്താവളത്തിൽ നിന്ന് അഫ്​ഗാനിസ്ഥാനിലെ കാണ്ഡഹാറിലേക്ക്​ പുറപ്പെടേണ്ട വിമാനത്തിൽ നിന്ന് ഹൈജാക്​ സന്ദേശം ലഭിച്ചതിനെ പിന്നാലെ നാടകീയ രംഗങ്ങൾ.

ഏരിയാന അഫ്ഗാൻ എയർലൈൻ വിമാനത്തിൽ നിന്നാണ് റാഞ്ചാന്‍ ശ്രമിക്കുന്നുവെന്ന തെറ്റായ സന്ദേശം എത്തിയത്. ടേക്ക് ഓഫിന് മുമ്പ് ​ പൈലറ്റ്​ അബദ്ധത്തിൽ ‘ഹൈജാക്​ ബട്ടൺ’ അമർത്തുകയായിരുന്നു. സുരക്ഷാ പരിശോധനകളെല്ലാം കഴിഞ്ഞതിന് തൊട്ടുപിന്നാലെയാണ് അപായ സന്ദേശം എത്തിയത്. പൈലറ്റ്​ ഹൈജാക്​ ബട്ടൺ അമർത്തിയതും സന്ദേശം നാഷണൽ സെക്യൂരിറ്റി ഗാർഡ്​ ഉൾപ്പെടെയുള്ള സു​രക്ഷാ ഏജൻസികളിൽ എത്തുകയും ചെയ്​തു. പിന്നാലെ വിമാനം എൻ.എസ്.ജി കമാൻഡോകൾ വളഞ്ഞു. ഭീകരരെ പിടികൂടാനുള്ള നീക്കങ്ങൾ ആരംഭിക്കുകയും ചെയ്തു. ഇതോടെ യാത്രക്കാർ ഭീതിയിലായി. പിന്നീടാണ്​ പൈലറ്റിന്​ പറ്റിയ അബദ്ധമാണെന്ന്​ അറിയിപ്പ്​ ലഭിച്ചത്​.

തുടർന്ന് വിമാനത്തിന് പറക്കാൻ അനുമതി നൽകുകയായിരുന്നു.ഒടുവിൽ വൈകിട്ട് 3.30ന് പോകേണ്ട വിമാനത്തിന് ആശയക്കുഴപ്പം പരിഹരിച്ചതിന് ശേഷം രണ്ടുമണിക്കൂർ കഴിഞ്ഞ് പറന്നുയരാനുള്ള അനുമതി നൽകി. അതേസമയം സംഭവത്തിൽ അധികൃതരുടെ ഭാഗത്തുനിന്നുള്ള വിശദികരണം വന്നിട്ടില്ല.