പ്രമേഹരോഗികൾ വ്യായാമം ചെയ്യുന്നത് രക്തത്തിലെ പഞ്ചസാരയുടെ അളവ് കുറയ്ക്കാനും ശരീരഭാരം നിയന്ത്രിക്കാനും സഹായിക്കും. ഇതിന് പുറമേ മറ്റ് ചില നേട്ടങ്ങൾ കൂടിയുണ്ട്. ഇൻസുലിൻ പ്രവർത്തനം മെച്ചപ്പെടുത്തുക, രക്തസമ്മർദ്ദം കുറയ്ക്കുക, ചീത്ത കൊളസ്ട്രോൾ നിയന്ത്രിക്കുക, പേശികളുടെ കരുത്ത് കൂട്ടുക എന്നിവയാണത്. പതിവായ വ്യായാമം ഹൃദ്റോഗ സാദ്ധ്യത കുറയ്ക്കും. വെയ്റ്റ് ട്രെയിനിംഗ്, സ്പ്രിന്റിംഗ്, കിക്ക് ബോക്സിംഗ്, കാർഡിയോ ട്രെയിനിംഗ് , നടത്തം എന്നീ വ്യായാമങ്ങൾ ഗുണം ചെയ്യും.
വ്യായാമം ആരംഭിക്കുന്നതിന് മുൻപ് വിദഗ്ദ്ധ ഡോക്ടറുടെ നിർദേശം തേടുക. വ്യായാമത്തിനിടെ അസാധാരണമായ ക്ഷീണം, നെഞ്ചിടിപ്പ് , വിയർപ്പ് എന്നിവയുണ്ടായാൽ വ്യായാമം തുടരരുത്. വ്യായാമത്തിന് മുമ്പ് മതിയായ അളവിൽ വെള്ളം കുടിക്കണം. പ്രമേഹം തടയാനുള്ള പ്രധാന മാർഗവും വ്യായാമമാണ് . മാനസിക സമ്മർദ്ദം ഒഴിവാക്കുക, ആരോഗ്യകരമായ ഭക്ഷണം, ശരീരഭാര നിയന്ത്രണം, വർഷം തോറുമുള്ള ചെക്ക് അപ് എന്നിവ പ്രമേഹത്തെ പ്രതിരോധിക്കാനും നിയന്ത്രണ വിധേയമാക്കാനും പരമപ്രധാനമാണ്.