വീട്ടിലുണ്ടാക്കുന്നതൊന്നും മക്കൾക്ക് കഴിക്കാൻ ഇഷ്ടമല്ലെന്ന് എല്ലാ അമ്മമാരുടെയും പരാതിയാണ്. ഇഷ്ടമുള്ളത് എന്തെങ്കിലും കഴിക്കട്ടേ എന്ന് കരുതി ഒടുവിൽ ഫാസ്റ്റ് ഫുഡും ബേക്കറി പലഹാരവും മതിയെന്ന് തീരുമാനിക്കും. അതിനോളം അപകടം മറ്റൊന്നുമില്ല താനും. കുട്ടികളെക്കൊണ്ട് ഭക്ഷണം കഴിപ്പിക്കുന്നതാണ് ഭക്ഷണമുണ്ടാക്കുന്നതിനേക്കാൾ അമ്മമാർക്ക് പാട് അവരെ കഴിപ്പിക്കുന്നതാണ്. ഭക്ഷണവും ഭക്ഷണശീലങ്ങളും കുട്ടികളിൽ അടിച്ചേൽപ്പിക്കാൻ പറ്റില്ല. അങ്ങനെ വരുമ്പോൾ തീരെ താത്പര്യമുണ്ടാകില്ല എന്നതാകും അനന്തരഫലം.

കുടുംബാംഗങ്ങൾ ഒന്നിച്ചിരുന്നു ഭക്ഷണം കഴിക്കുമ്പോൾ കൂടുതൽ ആസ്വാദ്യകരമാകും ആ അനുഭവം. അത്താഴ സമയത്ത് എല്ലാ കറികളും കുറച്ചെങ്കിലും കഴിക്കണമെന്ന് കുട്ടികളോട് പറയുക. കഴിക്കുന്നതിനനുസരിച്ച് കുട്ടികളെ അഭിനന്ദിക്കുക. ഒരിക്കലും കുട്ടികളെ നിർബന്ധിച്ച് ഭക്ഷണം കഴിപ്പിക്കരുത്.കുട്ടികൾക്ക് കഴിക്കാൻ പാകത്തിനുള്ള ആരോഗ്യ ഭക്ഷണം അടുക്കളയിൽ ഉണ്ടായിരിക്കണം എന്ന കാര്യത്തിൽ അമ്മമാർക്ക് നിർബന്ധമുണ്ടായിരിക്കണം. വിശക്കുമ്പോൾ കയ്യിൽ കിട്ടുന്നതെന്തും അവർ കഴിക്കും എന്നതിനാലാണിത്. കുട്ടികൾക്കുള്ള പഴങ്ങളും മറ്റു ആഹാരവസ്തുക്കളും അടുക്കളയുടെ മൂലയിലേക്ക് മാറ്റാതെ ഡൈനിംഗ് ടേബിളിൽ വച്ചാൽ കുട്ടികൾ എളുപ്പം എടുത്തു കഴിക്കും. പോഷകഗുണം നിറഞ്ഞ ആഹാരം കുട്ടികൾ തിരഞ്ഞെടുക്കുകയും കഴിക്കുകയും ചെയ്യുമ്പോൾ അവരെ മനസറിഞ്ഞ് പ്രോത്സാഹിപ്പിക്കാൻ മറക്കരുത്. നന്നായി പ്രഭാത ഭക്ഷണം കഴിച്ചാൽ മാത്രമേ ആരോഗ്യഭക്ഷണം കുട്ടികൾക്ക് ഉറപ്പാക്കാൻ പറ്റൂ.ചോക്ലേറ്റിനു പകരം പഴങ്ങളും പച്ചക്കറികളും കഴിക്കാൻ ഇഷ്ടപ്പെടുമ്പോൾ അവരെ ഉള്ളുതുറന്ന് അഭിനന്ദിക്കുകയും അവയുടെ നല്ല ഗുണങ്ങൾ പറഞ്ഞു കൊടുക്കുകയും വേണം. ഐസ്‌ക്രീമും ചോക്ലേറ്റും കഴിക്കാൻ വാശിപിടിക്കുമ്പോൾ അവരെ വഴക്കുപറയുന്നതിന് പകരം എന്തുകൊണ്ടാണ് അങ്ങനെ പറഞ്ഞതെന്ന് മനസിലാക്കാൻ ശ്രമിക്കുക. പല്ലുകൾ കേടുവരുമെന്ന് പറയുമ്പോൾ പെട്ടെന്ന് മനസിലാകും.

ടി.വിയിൽ മിന്നി മറയുന്ന പരസ്യങ്ങൾക്കിടയിലാണ് കാത്സ്യത്തിന്റെ പ്രാധാന്യം നമ്മളിലെത്തുന്നത്. എല്ലുകളുടെയും പല്ലുകളുടെയും വളർച്ചയ്ക് ഏറ്റവും അത്യാവശ്യമാണ് കാത്സ്യം എന്ന് മറക്കരുത്. പാൽ, ചീസ്, തൈര് എന്നിവയാണ് കാത്സ്യത്തിന്റെ സമ്പന്ന ഉറവിടങ്ങൾ. രാവിലെ ഒരു ഗ്ലാസ് പാൽ നൽകാൻ മറക്കരുത്. അതേ പോലെ ഉച്ചയ്ക്കോ വൈകിട്ടോ കട്ടത്തൈരും നൽകണം. പനീർ ചേർത്ത കറികൾ, പച്ചനിറത്തിലുള്ള ഇലക്കറികൾ, ഗ്രീൻ പീസ്, പാലക് ചീര എന്നിവയും പോഷകപ്രദമാണ്.

ശരീര കോശങ്ങളുടെ വളർച്ചയ്ക്ക് ഏറ്റവും അത്യാവശ്യമാണ് പ്രോട്ടീൻ എന്ന് ഓർക്കണം. മുട്ട, മത്സ്യം, ഇറച്ചി എന്നിവയിലാണ് പ്രോട്ടീൻ കൂടുതലുള്ളത്. പരിപ്പുകളിലും മീൻ, ഇറച്ചി, ഉഴുന്നു ചേർത്ത പലഹാരങ്ങളായ ഇഡ്ഡലി, ദോശ, മുട്ട എന്നിവയും ആവശ്യമായ അളവിൽ കുട്ടികൾക്ക് നൽകണം. അവർക്ക് ആസ്വാദ്യകരമാകുന്ന രീതിയിലാകണം ഭക്ഷണം നൽകേണ്ടത്.

നാരു ഉൾപ്പെടുന്ന ഭക്ഷണങ്ങൾ വളരെ ആവശ്യമാണ്. നമ്മൾ കഴിക്കുന്നതു ശരിയായി ദഹിക്കാനും ദഹനവ്യവസ്ഥയുടെ സുഗമമായ പ്രവർത്തനത്തിനും മലബന്ധം ഒഴിവാക്കാനും ഫൈബർ നന്നായി കഴിക്കണം. മലബന്ധം മിക്ക കുട്ടികളുടെയും വലിയ പ്രശ്നമാണ്. കുട്ടികളുടെ ആഹാരത്തിൽ ഫൈബർ അടങ്ങിയ ഭക്ഷണസാധനങ്ങൾ നിർബന്ധമായും നിത്യേന ഉൾപ്പെടുത്താൻ ശ്രദധിക്കണം. തവിടുള്ള ധാന്യങ്ങൾ ആഹാരം, ബീൻസ്, കടല, പയർ എന്നിവയും നന്നായി കഴിക്കണം. കഴുകിയ പഴങ്ങളും മെനുവിൽ ഉൾപ്പെടുത്താൻ മറക്കരുത്.
അയേൺ, അയേൺ എന്നു കേൾക്കുന്നതല്ലാതെ പലപ്പോഴും അിനെ കുറിച്ച് ധാരണ പലർക്കുമുണ്ടാകാൻ സാദ്ധ്യതയില്ല. മുട്ട, ഇറച്ചി, കരൾ, പച്ചിലക്കറികൾ, ഉണങ്ങിയ പഴങ്ങൾ, മുന്തിരി, ചീര തുടങ്ങിയവ അയേൺ സമൃദ്ധമാണ്. അതിനാൽ വൈറ്റമിൻ സി അടങ്ങിയ നാരങ്ങാനീര്, ഓറഞ്ച് നീര് തുടങ്ങിയവ ആഹാരശേഷം നൽകുന്നതു നല്ലതാണ്. ശർക്കര ചേർത്ത പലഹാരങ്ങൾ, പാലക് ചീര, അയേൺ, റാഗി എന്നിവയിൽ അയേണിനോടൊപ്പം കാത്സ്യവുമുണ്ട്.