തിരുവനന്തപുരം: നവോത്ഥാന പാരമ്പര്യം ഒരിക്കലും സി.പി.എമ്മിന് അവകാശപ്പെടാൻ കഴിയില്ലെന്ന് ശബരിമല കർമസമിതി സംസ്ഥാന ജനറൽ സെക്രട്ടറി വത്സൻ തില്ലങ്കേരി പറഞ്ഞു. നവോത്ഥാനവും സി.പി.എമ്മും തമ്മിലുള്ള ബന്ധം കടലും കടലാടിയും പോലെയാണെന്നും അദ്ദേഹം കൂട്ടിച്ചേർത്തു. ശബരിമലയെ തകർക്കാൻ ശ്രമിക്കുന്നെന്ന് ആരോപിച്ച് ശബരിമല കർമസമിതി പുത്തരിക്കണ്ടം മൈതാനത്ത് സംഘടിപ്പിച്ച അയ്യപ്പഭക്തജന സംഗമത്തിൽ സംസാരിക്കുകയായിരുന്നു അദ്ദേഹം.

'മുഖ്യമന്ത്രി പിണറായി വിജയൻ ഹിരണ്യകശിപുവിനെ പോലെയാണ് പെരുമാറുന്നത്. നാമജപം മുടക്കിയ ഹിരണ്യകശിപുവിന്റെ കുടൽമാല പുറത്തെടുത്ത് നിഗ്രഹം നടത്തിയ നരസിംഹത്തിന്റെ വീര്യമുള്ള സമൂഹമാണ് ഹിന്ദുസമൂഹം. മയങ്ങിക്കിടക്കുകയായിരുന്ന ഹിന്ദുസമൂഹം ശബരിമല വിഷയത്തോടെ ഉണർന്നെണീറ്റുവെന്നും ഹിരണ്യകശിപുമാരുടെ തകർച്ച ഉറപ്പാക്കാൻ കെൽപ്പുള്ളവരായി മാറിയെന്നും അദ്ദേഹം പറഞ്ഞു.