ഉലകനായകൻ കമൽഹാസന്റെ ഹിറ്റ് ചിത്രം ഇന്ത്യൻ 2 അണിയറയിലൊരുങ്ങുകയാണ്. 22 വർഷങ്ങൾക്ക് ശേഷമാണ് ചിത്രത്തിന് രണ്ടാം ഭാഗമൊരുക്കുന്നത്. ചിത്രത്തിൽ കമൽഹാസന് നായികയായി കാജൽ അഗർവാൾ എത്തുമെന്നാണ് ഏറ്റവും പുതിയ റിപ്പോർട്ടുകൾ. ചിത്രത്തിൽ ബോളിവുഡ് താരം അജയ് ദേവ്ഗൺ പ്രധാന വേഷത്തിലെത്തുന്നുണ്ട്. വിജയുടെ മെർസലായിരുന്നു കാജലിന്റേതായി അവസാനം പുറത്തിറങ്ങിയ ചിത്രം. ഡിസംബറിലാണ് ചിത്രത്തിന്റെ ഷൂട്ടിംഗ് തുടങ്ങുക. ഹൈദരാബാദാണ് ചിത്രത്തിന്റെ പ്രധാന ലൊക്കേഷനുകളിലൊന്ന്. തമിഴിന് പുറമെ തെലുങ്ക്,​ ഹിന്ദി ഭാഷകളിലും ചിത്രം പുറത്തിറങ്ങും.

ആദ്യ ഭാഗത്തിന്റെ ക്ലൈമാക്സിൽ ചിത്രത്തിന് രണ്ടാം ഭാഗമുണ്ടാകുമെന്ന സൂചനയോടെയാണ് അവസാനിച്ചത്. ചിത്രത്തിന്റെ ഫസ്റ്റ‌് ലുക്ക് പോസ്റ്റർ അടുത്തിടെ പുറത്തിറക്കിയിരുന്നു. വമ്പൻ പേക്ഷക പ്രതികരണമാണ് ഫസ്റ്റ‌് ലുക്കിന് കിട്ടിയത്.

200 കോടി രൂപ ബഡ്ജറ്റ‌ുള്ള സിനിമയാകും ഇന്ത്യൻ2 എന്നാണ് റിപ്പോർട്ടുകൾ. എ.ആർ റഹ്മാൻ തന്നെയാകും ചിത്രത്തിന് സംഗീതം ഒരുക്കുന്നത്.സാബു സിറിലാണ് കലാസംവിധാനം. പീറ്റർ ഹെയ്നാണ് ചിത്രത്തിന് സംഘട്ടനമൊരുക്കുന്നത്. രവിവർമ്മനാണ് ഛായാഗ്രഹണം നിർവഹിക്കുന്നത്. മുൻ ചിത്രത്തിലെ കഥാപാത്രങ്ങൾ പുതിയതിലും ഉണ്ടാകുമോ എന്ന് വ്യക്തമല്ല.