ന്യൂഡൽഹി: മാദ്ധ്യമ പ്രവർത്തനത്തിന് വിശ്വാസ്യത അനിവാര്യമാണെന്ന് കേന്ദ്രധനമന്ത്രി അരുൺ ജയ്റ്റ്ലി പറഞ്ഞു. പ്രസ് കൗൺസിൽ ഒാഫ് ഇന്ത്യയുടെ ദേശീയ മാദ്ധ്യമ അവാർഡുകൾ വിതരണം ചെയ്തു സംസാരിക്കുകയായിരുന്നു അദ്ദേഹം. പൊതുജനസമ്മതി സ്വരൂപിക്കുന്നിടത്താണ് മാദ്ധ്യമ വിജയം. അഭിപ്രായ സ്വാതന്ത്ര്യം ഉയർത്തിപ്പിടിച്ച് മാത്രം പ്രവർത്തിക്കാനാകില്ല. മാദ്ധ്യമങ്ങളുടെ പേരിലുള്ള കച്ചവട താത്പര്യങ്ങൾ യഥാർത്ഥ മാദ്ധ്യമ പ്രവർത്തനങ്ങളെ ചോദ്യം ചെയ്യുന്നതാണെന്നും അരുൺ ജയ്റ്റ്ലി പറഞ്ഞു.
വികസനോൻമുഖ റിപ്പോർട്ടിംഗിനുള്ള പ്രസ് കൗൺസിലിന്റെ ദേശീയ അവാർഡ് കേരള കൗമുദി ഡെപ്യൂട്ടി എഡിറ്റർ വി.എസ്. രാജേഷ് ഏറ്റുവാങ്ങി. സമഗ്രസംഭാവനയ്‌ക്കുള്ള രാജാറാം മോഹൻറായ് പുരസ്‌ക്കാരം മുതിർന്ന മാദ്ധ്യമ പ്രവർത്തകനും ഹിന്ദു ദിനപത്രം ചെയർമാനുമായ എൻ.റാമിന് നൽകി. പ്രസ് കൗൺസിൽ ചെയർമാൻ ജസ്‌റ്റിസ് ചന്ദ്രകുമാർ മൗലി പ്രസാദ് അദ്ധ്യക്ഷത വഹിച്ചു.