കാസർകോട്: സ്വത്ത് തർക്കത്തെ തുടർന്ന് പൊലീസുകാരൻ ബന്ധുവിനെ കുത്തിക്കൊന്നു. കാസർകോട് കാറഡുക്ക ശാന്തി നഗറിലെ മാധവൻ നായർ (65) ആണ് കൊല്ലപ്പെട്ടത്. ഇന്ന് ഉച്ചയോടെയാണ് സംഭവം. കൊല്ലപ്പെട്ട മാധവൻ നായരുടെ ഭാര്യയുടെ സഹോദരി മകനായ ശ്യാമാണ് കുത്തിക്കൊന്നത്. പൊലീസ് കോൺസ്റ്റബിളായ ഇയാൾ ഇപ്പോൾ കസ്റ്റഡിയിലാണ്. കുടുംബ പ്രശ്നമാണ് കൊലയ്ക്ക് നയിച്ചതെന്ന് പ്രതി പൊലീസിന് മൊഴി നൽകി.

ഇന്ന് ഉച്ചയോടെ പ്രതിയായ ശ്യാം മാധവൻ നായരുടെ വീട്ടിലെത്തുകയും യാതൊരു പ്രോകപനവുമില്ലാതെ കഠാരയെടുത്ത് നെഞ്ചിലേക്ക് കുത്തുകയായിരുന്നു. കൊലയ്ക്ക് ശേഷം തൊട്ടടുത്ത സ്ഥലത്ത് നിന്നും പ്രതിയെ നാട്ടുകാർ പിടി കൂടി പോലീസിൽ ഏൽപ്പിക്കുകയായിരുന്നു. കുത്തേറ്റ മാധവൻ നായരെ ഉടൻ സ്വകാര്യ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.