സാമൂഹിക പ്രസക്തിയുള്ള സിനിമകളിലൂടെയും നിലപാടുകളിലൂടെയും ശ്രദ്ധേയനായ തമിഴ് സംവിധായകൻ പാ. രഞ്ജിത്ത് ബോളിവുഡിൽ അരങ്ങേറ്റം കുറിക്കുന്നു. സ്വാതന്ത്ര്യ സമരനേതാവ് ബിർസ മുണ്ടയുടെ ജീവിതത്തെ കുറിച്ച് പറയുന്ന ചിത്രമാണ് രഞ്ജിത്ത് ഹിന്ദിയിൽ ഒരുക്കുന്നത്. മഹാശ്വേതാദേവി രചിച്ച ആരണ്യേർ അധികാർ എന്ന പുസ്തകത്തെ അടിസ്ഥാനമാക്കുന്നതാണ് ചിത്രമെന്ന് രഞ്ജിത്ത് സാമൂഹിക മാദ്ധ്യമങ്ങളിലൂടെ അറിയിച്ചു. ബ്രിട്ടീഷ് സൈന്യത്തിനെതിരെ ഝാർഖണ്ഡ്, ബീഹാർ, ഒഡീഷ തുടങ്ങിയ സംസ്ഥാനങ്ങളിലെ വനങ്ങൾ കേന്ദ്രീകരിച്ച് ഗറില്ല യുദ്ധം നടത്തിയ ആദിവാസി നേതാവാണ് ബിർസ മുണ്ട.
ആരാണ് ബിർസയുടെ വേഷം അവതരിപ്പിക്കുകയെന്ന് പ്രഖ്യാപിച്ചിട്ടില്ല. നമാ പിക്ചേഴ്സിന്റെ ബാനറിൽ ഷരീൻ മന്ത്രി, കിഷോർ അറോറ എന്നിവർ ചേർന്നാണ് നിർമ്മാണം. അട്ടക്കത്തി എന്ന ചിത്രത്തിലൂടെ അരങ്ങേറ്റം കുറിച്ച പാ. രഞ്ജിത്ത് രജനികാന്ത് നായകനായ കബാലി, കാല എന്നീ ചിത്രങ്ങൾ സംവിധാനം ചെയ്തു. പ്രേക്ഷക ശ്രദ്ധയും നിരൂപക പ്രശംസയും നേടിയ പരിയേറും പെരുമാർ നിർമ്മിച്ചതും രഞ്ജിത്താണ്. സിൽക്ക് സ്മിതയുടെ ജീവിതം ആസ്പദമാക്കി ഒരുക്കുന്ന വെബ് സീരീസ് സംവിധാനം ചെയ്യാനും രഞ്ജിത്തിന് പദ്ധതിയുണ്ട്.