പത്തനംതിട്ട: ശബരിമലയിലെ സംഘർഷ സാദ്ധ്യത കണക്കിലെടുത്ത് പ്രഖ്യാപിച്ച നിരോധനാജ്ഞ നീട്ടണമെന്ന് ആവശ്യപ്പെട്ട് പൊലീസിന്റെ റിപ്പോർട്ട്. ഇതുമായി ബന്ധപ്പെട്ട് പത്തനംതിട്ട ജില്ലാ കളക്ടർക്ക് എസ്.പി റിപ്പോർട്ട് നൽകി.

സന്നിധാനം, പമ്പ, നിലയ്ക്കൽ, ഇലവുങ്കൽ എന്നിവടങ്ങളിൽ പ്രഖ്യാപിച്ച നിരോധനാജ്ഞ ഇന്ന് അവസാനിക്കുന്ന സാഹചര്യത്തിലാണ് നിരോധനാജ്ഞ നീട്ടണമെന്ന് പൊലീസ് ആവശ്യപ്പെട്ടിരിക്കുന്നത്‌. ജനുവരി 14വരെ നിരോധനാജ്ഞ നീട്ടണമെന്നാണ് പൊലീസിന്റെ ആവശ്യം.

അതേസമയം, നിരോധനാജ്ഞ നിലനിർത്തേണ്ട സാഹചര്യം ഇപ്പോഴില്ലെന്ന് ചൂണ്ടിക്കാട്ടി റാന്നി, കോന്നി തഹസിൽദാർമാർ പത്തനംതിട്ട കളക്ടർക്ക് റിപ്പോർട്ട് സമർപ്പിച്ചിരുന്നു. സംഘർഷ സാദ്ധ്യത ഇല്ലാത്തതിനെ തുടർന്നാണ് നിരോധനാജ്ഞ പിൻവലിക്കാൻ തഹസിൽദാർമാർ ആവശ്യപ്പെട്ടത്. എന്നാൽ ഇതുമായി ബന്ധപ്പെട്ട തീരുമാനം കളക്ടർ ഇന്ന് വൈകുന്നേരം അറിയിക്കുമെന്നാണ് സൂചന. ഒരാഴ്ച മുമ്പാണ് ശബരിമല, പമ്പ, നിലയ്ക്കൽ, ഇലവുങ്കൽ എന്നിവിടങ്ങളിൽ നിരോധനാജ്ഞ പ്രഖ്യാപിച്ചത്.