ഫോസ്ഫറസ്

രക്തത്തിലെ ഫോസ്ഫറസ് വർദ്ധിക്കുകയും കാത്സ്യം കുറയുകയും ചെയ്യുന്നതുമൂലം ഭാവിയിൽ എല്ല് തേയ്മാനം, ബലക്കുറവ് ഇവയ്ക്ക് കാരണമാകുന്നു. ഫോസ്ഫറസ് അധികമായാൽ ദേഹം ചൊറിച്ചിൽ, രക്തയോട്ടക്കുറവ്, പേശീതളർച്ച, സന്ധിവേദന ഇവ ഉണ്ടാകുന്നു. ലീച്ചിംഗ് പ്രക്രിയ 15 മിനിട്ട് തുടർന്നാൽ പൊട്ടാസ്യം പോലെ തന്നെ ഒരു പരിധി വരെ ഫോസ്ഫറസും കുറയ്ക്കാൻ സാധിക്കും.

ഫോസ്ഫറസ് ധാരാളമടങ്ങിയ പാൽ, പാൽ ഉത്പന്നങ്ങൾ, കാർബണേറ്റഡ് ബിവറേജസ് ഇവ മിതമായി ഉപയോഗിക്കുക. രക്തത്തിലെ ഫോസ്ഫറസിന്റെ അളവനുസരിച്ച് 150 200 മില്ലീ പാൽ, പാലുത്പന്നങ്ങൾ ഉപയോഗിക്കാവുന്നതാണ്. 800 മുതൽ 1000 മില്ലിഗ്രാം വരെ ഫോസ്ഫറസ് ഒരു വൃക്കരോഗിക്ക് മതിയാകും.

സോഡിയം

സോഡിയം അടങ്ങിയിട്ടുള്ള ഉപ്പ്, ബേക്കറി പലഹാരങ്ങൾ, പ്രോസസ് ചെയ്ത ഭക്ഷണങ്ങൾ, പ്രിസർവേറ്റീവുകൾ ഇവ ഒഴിവാക്കുക. ഉപ്പിന്റെ അളവ് അധികമായാൽ നീർവീക്കം, ശ്വാസം മുട്ടൽ, അമിത രക്തസമ്മർദ്ദം എന്നിവ ഉണ്ടാകുന്നു. അച്ചാർ, ഉണക്കമീൻ, പപ്പടം മുതലായവ പൂർണമായും ഉപേക്ഷിക്കുക. വൃക്കരോഗിക്ക് 45 ഗ്രാം ഉപ്പ് ഉപയോഗിക്കാവുന്നതാണ്. എന്നാൽ നീര്, രക്തസമ്മർദ്ദം ഇവ പരിഗണിച്ച് 3 ഗ്രാം ആയി ചുരുക്കണം.

ഇരുമ്പ്

വൃക്കയിൽ നിന്ന് ഉത്പാദിപ്പിക്കുന്ന എരിത്രോപോയറ്റിൻ എന്ന രാസാഗ്നിയുടെ ദൗർലഭ്യം ഇത്തരം രോഗികളിൽ രക്താണുക്കളുടെ ഉത്പാദനം കുറയ്ക്കുകയും ഹീമോഗ്‌ളോബിന്റെ അളവ് കുറയുന്നതിന് കാരണമാകുകയും ചെയ്യുന്നു. എന്നാൽ ഇരുമ്പ് ധാരാളമടങ്ങിയ ഭക്ഷണത്തിലൂടെ ഇത് പരിഹരിക്കുക പ്രായോഗികമല്ല എന്നതിനാൽ ഡോക്ടർ എരിത്രോ പോയറ്റിൻ ഇൻജക്ഷൻ നിർദ്ദേശിക്കുന്നതാണ്.

വെള്ളം

പുറന്തള്ളപ്പെടുന്ന മൂത്രത്തിന്റെ അളവിനനുസരിച്ചാണ് കുടിക്കേണ്ട വെള്ളത്തിന്റെ അളവ് നിയന്ത്രിക്കുന്നത്. അന്തരീക്ഷ ഊഷ്മാവിൽ ദ്രാവകരൂപേണയുള്ള എല്ലാ പദാർത്ഥങ്ങളെയും വെള്ളമായി പരിഗണിക്കണം. ഇപ്രകാരം കറി, ചായ, ഓട്സ് ഇവയെല്ലാം വെള്ളത്തിന്റെ കൂട്ടത്തിൽ ഉൾപ്പെടുന്നതാണ്. വെള്ളത്തിന്റെ അളവ് ഡോക്ടറുടെ നിർദ്ദേശപ്രകാരം ക്രമപ്പെടുത്തുക.

ഡയാലിസിസ്

ഡയാലിസിസിന് വിധേയനാകുന്ന വ്യക്തിക്ക് പ്രോട്ടീന്റെ ആവശ്യകത വളരെ കൂടുതലാണ്. ഓരോ ഡയാലിസിസിനിടയിലും 10 മുതൽ 12 ഗ്രാം വരെ അമിനോ ആസിഡുകൾ നഷ്ടമാകുന്നു. ഇപ്രകാരം നഷ്ടമാകുന്ന പ്രോട്ടീൻ തിരികെ ശരീരത്തിലെത്താത്തപക്ഷം അത് രോഗിയുടെ ജീവിതനിലവാരത്തെ പ്രതികൂലമായി ബാധിക്കുന്നു. ഹീമോഡയാലിസിസ് ചെയ്യുന്ന വ്യക്തിക്ക് 1.2 ഗ്രാം പ്രോട്ടീൻ, പെരിട്ടോണിയൽ ഡയാലിസിസിന് വിധേയനാകുന്ന വ്യക്തിക്ക് 1.5 ഗ്രാം പ്രോട്ടീൻ എന്ന തോതിൽ ഓരോ കിലോഗ്രാം ശരീരഭാരത്തിന് അനുസരിച്ച് ദിവസേന നൽകേണ്ടതാണ്.

വൃക്കമാറ്റിവയ്ക്കൽ ശസ്ത്രക്രിയ

ഇത്തരം വ്യക്തിക്ക് കൊഴുപ്പും ഉപ്പും കുറഞ്ഞ പോഷകങ്ങളെല്ലാം കൃത്യമായ അളവിലും അനുപാതത്തിലും അടങ്ങിയ സമീകൃതാഹാരം കഴിക്കാവുന്നതാണ്. അതുവഴി

1. ശരീരഭാരം നിലനിറുത്തുക
2. രക്തത്തിലെ പഞ്ചസാര, കൊളസ്‌ട്രോൾ, രക്തസമ്മർദ്ദം ഇവ നിയന്ത്രിക്കുക
3. എല്ലിന്റെ സാന്ദ്രത നിലനിറുത്തുക
4.ആഹാരശുചിത്വം പാലിക്കുക.

ഷബിന. ബി.
നെഫ്‌റോ ഡയറ്റിഷ്യൻ