പാനൂർ : ആറു ദിവസം മുമ്പ് പാനൂരിൽ നിന്നു കാണാതായ ഉറ്റ സുഹൃത്തുക്കളായ രണ്ടു പെൺകുട്ടികളെ മലപ്പുറം തിരൂരിൽ പൊലീസ് കണ്ടെത്തി. പാനൂർ സി.ഐക്ക് ലഭിച്ച സന്ദേശത്തിന്റെ അടിസ്ഥാനത്തിൽ നടത്തിയ അന്വേഷണത്തിൽ തിരൂരിലെ സ്വകാര്യ ടൂറിസ്റ്റ് ഹോമിൽ നിന്ന് ഇവരെ കസ്റ്റഡിയിലെടുത്തു. രണ്ടു ദിവസമായി ഇവർ ഇവിടെ താമസിച്ചു വരികയായിരുന്നെന്ന് തിരൂർ പൊലീസ് പറഞ്ഞു.

കുന്നോത്ത് പറമ്പിലെ കുമാരന്റെ മകളായ സയന (19), പൊയിലൂരിലെ പ്രഭാകരന്റെ മകളായ ദൃശ്യ (19) എന്നിവരെയാണ് 19ന് രാവിലെ കാണാതായത്. പാനൂരിലെ സ്വകാര്യ സ്ഥാപനത്തിൽ ലാബ് ടെക്നിഷ്യൻ കോഴ്സ് വിദ്യാർത്ഥിനികളാണ്. പതിവുപോലെ പാനൂരിൽ ക്ലാസിനെത്തിയതായിരുന്നു ഇരുവരും. സയനയുടെ സ്കൂട്ടറിലാണ് എത്തിയത്. സ്കൂട്ടർ റോഡരികിൽ നേരത്തേ കണ്ടെത്തിയിരുന്നു.

കുട്ടിക്കാലം മുതൽ വേർപിരിയാത്ത സുഹൃത്തുക്കളാണ് ഇരുവരുമെന്ന് സയനയുടെ മാതാപിതാക്കൾ പറഞ്ഞു. ദൃശ്യയുടെ വിവാഹം അടുത്ത ദിവസം നടത്താൻ തീരുമാനിച്ചിരുന്നു.