സിനിമയിൽ തിരക്കിലാണെങ്കിലും തന്റേതായ ഒരു ബിസിനസ് സംരംഭം പ്രിയപ്പെട്ട നാട്ടുകാർക്കു കൂടി പ്രയോജനപ്രദമാകണമെന്ന ആശയത്തിൽ നിന്നാണ് നടൻ ധർമ്മജൻ ബോൾഗാട്ടി ധർമ്മൂസ് ഫിഷ് ഹബിന് തുടക്കമിട്ടത്. കൊച്ചിയിൽ ആരംഭിച്ച സ്ഥാപനത്തെ നാട്ടുകാർ ഇരുകൈയും നീട്ടിയാണ് സ്വീകരിച്ചത്.ഫോർമാലിനുംമറ്റ് രാസവസ്‌തുക്കളും അടങ്ങിയ മീനുകളുടെ കഥ കേട്ട് ഇനി എന്ത് ചെയ്യണമെന്ന ആശങ്കയിൽ ഇരിക്കുന്ന മലയാളിക്ക് വിഷമില്ലാത്ത മീനുകൾ എന്ന പുതിയ പ്രതീക്ഷ നൽകുക കൂടിയായിരുന്നു ധർമ്മജനും സുഹൃത്തുക്കളും.
ഇപ്പോഴിതാ കോട്ടയത്തും ധർമ്മൂസ് ഫിഷ് ഹബുമായി എത്തിയിരിക്കുകയാണ് ധർമ്മജൻ. നടൻ വിജയരാഘവനാണ് പുതിയ ഫ്രാഞ്ചൈസിയുടെ മേൽനോട്ടം. കോട്ടയത്ത് കളത്തിപ്പടിയിലാണ് പുതിയ ധർമ്മൂസ് ഫിഷ് ഹബ്. ഇന്നലെ നടൻ ബിജു മേനോനാണ് ഫിഷ് ഹബ് ഉദ്‌ഘാടനം ചെയ്‌തത്. രമേശ് പിഷാരടി, സുരേഷ് കൃഷ്‌ണ, വിജരാഘവൻ,ധർമജൻ, കലാഭവൻ പ്രചോദ്, പൊന്നമ്മ ബാബു, കോട്ടയം പ്രദീപ് തുടങ്ങിയവർ ചടങ്ങിൽ പങ്കെടുത്തു.
വിജയരാഘവൻ ഈ ഫ്രാഞ്ചൈസി ഏറ്റെടുക്കാൻ കാരണം ധർമജൻ വ്യക്തമാക്കി- 'കുട്ടേട്ടൻ (വിജയരാഘവൻ) കൊച്ചിയിൽ ഷൂട്ടിംഗിന് വരുമ്പോഴൊക്കെ എന്നെ വിളിക്കും, 'ധർമ്മജാ ഞാൻ അവിടെ വരുമ്പോൾ നല്ല മീൻ തരണമെന്ന്.' അപ്പോൾ ഞാൻ പറയും 'ചേട്ടാ ഇനി മുതൽ ഇങ്ങോട്ടു വരണ്ട ഞങ്ങൾ അങ്ങോട്ടുവരാമെന്ന്'.
വിജയരാഘവനെ കൂടാതെ നാദിർഷാ, കുഞ്ചാക്കോ ബോബൻ, ബിജു മേനോൻ, രമേഷ് പിഷാരടി, ടിനി ടോം എന്നിവരാണു ഫ്രാഞ്ചൈസികൾ എടുക്കുന്നത്. മറ്റു ജില്ലകളിലേക്കും വ്യാപിപ്പിക്കും. കൊച്ചിയിലെ മത്സ്യബന്ധന ഹബ്ബുകളായ മുളവുകാട്, വൈപ്പിൻ, വരാപ്പുഴ, ചെല്ലാനം എന്നിവിടങ്ങളിലെ മീൻപിടിത്തക്കാരിൽനിന്നു നേരിട്ടു മീൻ വാങ്ങി അയ്യപ്പൻകാവിലെ ധർമ്മൂസ് ഫിഷ് ഹബ്ബിൽ വിൽപനയ്‌ക്ക് എത്തിക്കുന്ന രീതി സാമ്പത്തിക വിജയം കണ്ടതോടെയാണ് കൂടുതൽ താരങ്ങൾ പങ്കുചേരുന്നത്. പ്രതിദിനം ശരാശരി രണ്ടര ലക്ഷം രൂപയുടെ വിൽപനയുണ്ട്.
ഇടനിലക്കാരെ ഒഴിവാക്കുന്നതിനാൽ മീൻപിടിത്തക്കാർക്കു കൂടുതൽ മികച്ച നിരക്കു ലഭിക്കുന്നുണ്ടെന്നു ധർമ്മജൻ പറയുന്നു. സിനിമയിൽ ശ്രദ്ധിക്കപ്പെടുന്നതിന് മുൻപ് പരമ്പരാഗത മൽസ്യത്തൊഴിലാളികളുടെ കൂട്ടത്തിൽ മീൻപിടിക്കാൻ പോകുമായിരുന്ന ധർമജന് ഇത്തരം രീതികൾ അറിയാമെന്നതും ഗുണകരമായി. മീൻപിടിത്തക്കാർക്ക് എപ്പോൾ പിടിക്കുന്ന മീനും ഉടൻ ധർമ്മൂസ് ഹബ്ബിൽ എത്തിക്കാമെന്നതാണ് വിജയത്തിന് പിന്നിലെ ഘടകങ്ങളിലൊന്ന്.
അയ്യപ്പൻകാവിലെ കടയിൽ മീൻ വിഭവങ്ങൾ ഇപ്പോൾ പാകം ചെയ്‌തു കൊടുക്കുന്നുണ്ട്. ഫോൺവഴി ആവശ്യപ്പെട്ടാൽ അര മണിക്കൂറിനകം നാടൻ രീതിയിൽ പാകപ്പെടുത്തി നൽകും. നിശ്ചിത സ്ഥലങ്ങളിൽ ഹോം ഡെലിവറിയുമുണ്ട്. ഫ്രാഞ്ചൈസികളിലും പാകംചെയ്‌ത മീൻ വിഭവങ്ങളുടെ വിൽപനയുണ്ടാകും. സിനിമാതാരങ്ങൾ അല്ലാത്തവർക്കും ഫ്രാഞ്ചൈസി നൽകുമെന്ന് ധർമജൻ പറയുന്നു.
താരങ്ങളുടെ മീൻ ഫ്രാഞ്ചൈസികൾ
വിജയരാഘവൻ –കോട്ടയം
കുഞ്ചാക്കോ ബോബൻ –പാലാരിവട്ടം
രമേഷ് പിഷാരടി –വെണ്ണല
ടിനി ടോം –ആലുവ
നാദിർഷ, ദിലീപ് –കളമശേരി