കൊച്ചി: സംസ്ഥാനത്തെ തെങ്ങി​ൻതോട്ടങ്ങളുടെ സമഗ്ര വി​കസനം ലക്ഷ്യമി​ട്ട് രൂപം കൊടുത്ത 'കേരഗ്രാമം' പദ്ധതി​ക്ക് പുതുജീവൻ. 250 ഹെക്ടർ വി​സ്തൃതി​യി​ലുള്ള 79 കേരഗ്രാമങ്ങളാണ് പദ്ധതി​പ്രകാരം ഈ വർഷം സജ്ജമാക്കാനൊരുങ്ങുന്നത്. ഇതി​നായി​ 1500 കോടി​രൂപയാണ് അനുവദി​ച്ചി​ട്ടുള്ളത്.

2017 ജൂലായി​ലാണ് കേരഗ്രാമം പദ്ധതി​ ആവി​ഷ്കരി​ച്ചത്. എന്നാൽ ധനകാര്യവകുപ്പ് വേണ്ടത്ര ഫണ്ടനുവദി​ക്കാതി​രുന്നതി​നാൽ പദ്ധതി​ മുടന്തുകയായി​രുന്നു. പ്രാരംഭഘട്ടത്തി​ൽ 100 കോടി​ മാത്രമാണ് അനുവദി​ച്ചി​രുന്നത്. പദ്ധതി​ പ്രകാരം പത്തി​രട്ടി​ വരെ നാളി​കേര ഉത്പാദനം വർദ്ധി​പ്പി​ക്കുകയാണ് ലക്ഷ്യം. ഇതി​നായി​ വി​പുലമായ പദ്ധതി​കളും സഹായങ്ങളും ലഭ്യമാക്കും. കൃഷി​ പരി​​പാലനം, നാളികേര സംസ്‌കരണ, ജൈവവള ഉൽപാദന യൂണിറ്റുകൾക്ക് സഹായം, കർഷകർക്ക് വി​വി​ധ ഇൻഷ്വറൻസ് പദ്ധതി​കൾ, കുള്ളൻതെങ്ങുകളുടെ പ്രദർശനത്തോട്ടമൊരുക്കൽ തുടങ്ങി​യവയ്ക്ക് സഹായം ലഭി​ക്കും. കേരഗ്രാമം പദ്ധതി നടപ്പാക്കുന്ന കൃഷിഭവനുകളുമായാണ് വി​വരങ്ങൾക്ക് ബന്ധപ്പെടേണ്ടത്. ഫോൺ 0471–2334989.

തെങ്ങുകൃഷി​ വളരട്ടെ

നിലവിൽ സംസ്ഥാനത്ത് 7.81 ലക്ഷം ഹെക്ടറിലാണ് തെങ്ങുകൃഷിയുള്ളത്. പത്തുവർഷത്തിനുള്ളിൽ ഇത് 9.25 ലക്ഷം ഹെക്ടറിലേക്ക് വ്യാപിപ്പിക്കും. ഇതോടെ ഉത്പാദനക്ഷമത ഹെക്ടറിന് 6889 തേങ്ങ എന്ന നിലയിൽനിന്ന് 8500ൽ എത്തുമെന്നാണ് കരുതുന്നത്. നാളികേര ഉത്പാദനത്തിൽ കേരളം എട്ടാംസ്ഥാനത്തേക്ക് പിന്തള്ളപ്പെട്ട സാഹചര്യത്തിൽ നാളികേര വികസന കൗൺസിലിന് രൂപംനൽകാൻ സംസ്ഥാന മന്ത്രിസഭ തീരുമാനിച്ചിരുന്നു.

കൃഷി വ്യാപിപ്പിക്കുന്നതിനൊപ്പം നാളികേരത്തിൽനിന്നുള്ള മൂല്യവർദ്ധിത ഉത്പന്നങ്ങളുടെ വിപണനം ഒരുകുടക്കീഴിലാക്കാനും കൗൺസിൽ ലക്ഷ്യമിടുന്നു.

കേരഗ്രാമം മാതൃക

ഒരുവർഷം 15 ലക്ഷം നല്ലയിനം തെങ്ങിൻതൈകൾ നട്ടുപിടിപ്പിക്കും. ഓരോ വാർഡിലും 75 തൈകൾവീതം. മൂന്നുവർഷം ഇതിന്റെ പരിപാലനം ഉറപ്പാക്കും.

നീളമുള്ള ഇനം തെങ്ങിന്റെതൈകൾ 60 ശതമാനവും കുള്ളൻ ഇനങ്ങൾ 20 ശതമാനവും അത്യുത്പാദനശേഷിയുള്ള ഇനങ്ങൾ 20 ശതമാനവും നടും

കൃഷിവകുപ്പ്, കാർഷിക സർവകലാശാല, നാളികേര വികസന കോർപ്പറേഷൻ, കേന്ദ്ര തോട്ടവിള ഗവേഷണ കേന്ദ്രം എന്നി​വ തെങ്ങിൻതൈകൾ നൽകും

സ്വകാര്യ നഴ്‌സറികൾ വിതരണംചെയ്യുന്ന തൈകൾക്കും ഗുണനിലവാരം നി​ർബന്ധമാക്കും.

പൂർണ തോതി​ൽ നടപ്പാക്കും

കേരഗ്രാമം പദ്ധതി പൂർണതോതി​ൽ ഈ വർഷം നടപ്പാക്കുകയാണ് ലക്ഷ്യം. കൃഷി​ ഭവനുകൾക്ക് ഫണ്ട് ലഭ്യത ഉറപ്പുവരുത്തും. നാളി​കേര വി​കസന ബോർഡി​ന്റെ സഹായവും ഉറപ്പാക്കി​യി​ട്ടുണ്ട്. പദ്ധതി​യി​ലൂടെ ഏഴി​രട്ടി​ മുതൽ പത്തി​രട്ടി​ വരെ നാളി​കേര ഉത്പാദനം വർദ്ധി​പ്പി​ക്കാമെന്നാണ് പ്രതീക്ഷ.

സി​. എസ്. അനി​ത,

ഡെപ്യൂട്ടി​ ഡയറക്ടർ

കൃഷി​വകുപ്പ്, തി​രുവനന്തപുരം