അജ്മീർ: കോൺഗ്രസ് അധ്യക്ഷൻ രാഹുൽ ഗാന്ധി കശ്മീരി ബ്രാഹ്മണനാണെന്ന് പൂജാരിയുടെ വെളിപ്പെടുത്തൽ. അദ്ദേഹത്തിന്റെ ഗോത്രം ദാത്താത്രേയ ആണെന്നും പൂജാരി പറഞ്ഞു. രാജസ്ഥാനിലെ ക്ഷേത്ര പൂജാരിയായ ദീനനാഥ് കൗളാണ് രാഹുൽ ഗാന്ധിയുടെയും കുടുംബത്തിന്റെയും ഗോത്രത്തെ കുറിച്ച് വെളിപ്പെടുത്തൽ നടത്തിയത്.രാജസ്ഥാനിലെ പുഷ്കർ ക്ഷേത്രത്തിലെത്തിയ രാഹുൽ ഗാന്ധി പൂജാകർമ്മങ്ങൾ നടത്തിയത് ദീനനാഥ് കൗളിന്റെ കാർമ്മികത്വത്തിലായിരുന്നു. പൂജക്കായി എത്തിയപ്പോൾ ഗോത്രം ഏതെന്ന് ചോദിച്ചപ്പോഴാണ് രാഹുൽ ഇക്കാര്യം വെളിപ്പെടുത്തിയതെന്ന് കൗൾ വ്യക്തമാക്കി.

രാഹുൽ ഗാന്ധിയുടെ ഗോത്രം ദത്താത്രേയയാണ്. അദ്ദേഹം ഒരു കശ്മീരി ബ്രാഹ്മണനാണ്. മോത്തിലാൽ നെഹ്രു,​ ജവഹർലാൽ നെഹ്രു,​ ഇന്ദിരാഗാന്ധി,​ സോണിയ ഗാന്ധി തുടങ്ങിയവരെല്ലാം ഇവിടെ പൂജകൾ നടത്തിയിട്ടുണ്ട്. അതിന്റെ തെളിവുകളെല്ലാം ഇവിടെ സൂക്ഷിച്ചിട്ടുമുണ്ട് - ദീനനാഥ് കൗൾ പറഞ്ഞു.

ദത്താത്രേയ ഗോത്രവർഗ്ഗത്തിൽ പെട്ടവർ കൗൾ വിഭാഗത്തിൽ പെട്ടവരാണെന്നും അവർ കശ്മീരി ബ്രാഹ്മണരാണെന്നുംകൗൾ വ്യക്തമാക്കി. തിരഞ്ഞെടുപ്പ് നടക്കാനിരിക്കുന്ന സംസ്ഥാനങ്ങളിൽ രാഹുൽ ഗാന്ധി അജ്മീർ ദർഗ്ഗ ഉൾപ്പെടെ വിവിധ ക്ഷേത്രങ്ങളും സന്ദർശിച്ചിരുന്നു. എന്നാൽ രാഹുൽ ഗാന്ധിയുടെ ക്ഷേത്ര ദർശനം ജനങ്ങളെ കബളിപ്പിക്കാനാണെന്നാണ് ബി.ജെ.പിയുടെ ആരോപണം. ഈ സാഹചര്യത്തിലാണ് പൂജാരിയുടെ വെളിപ്പെടുത്തൽ.