കേരളം പ്രളയത്തിൽ വിറച്ച് വിറങ്ങലിച്ചപ്പോൾ കൈയ് മെയ് മറന്ന് നമ്മളെ സഹായിച്ചവരാണ് അയൽ പക്കമായ തമിഴ്നാട്. അവിടത്തെ ഭരണകൂടവും, സർക്കാർ ജീവനക്കാരും,രാഷ്ട്രീയ പാർട്ടികളും, സിനിമാ താരങ്ങളും സഹായവുമായി ഓടി എത്തിയിരുന്നു. എന്നാൽ ഇപ്പോൾ ഗജ ചുഴലിക്കാറ്റിന്റെ പേരിൽ പ്രകൃതിയുടെ പരീക്ഷണം നേരിടുകയാണ് തമിഴകം. നമ്മുടെ സർക്കാർ പത്ത് കോടിയുടെ സഹായവും ടൺ കണക്കിന് അവിശ്യ സാധനങ്ങളുമാണ് അവിടെ കയറ്റി അയച്ചത്.

എന്നാൽ കേരളത്തിലും തമിഴ്നാട്ടിലും പ്രകൃതി ദുരന്തമുണ്ടായപ്പോൾ തന്നാലാവുന്ന സഹായം ദുരന്തമുഖത്ത് നേരിട്ടെത്തി നൽകി മാതൃകയാവുകയാണ് കേരളത്തിന്റെ സ്വന്തം സന്തോഷ് പണ്ഡിറ്റ്. കേരളത്തിലെ പ്രളയകാലത്ത് വിവിധ ജില്ലകളിലായി ദുരിത ബാധിതർക്ക് സഹായവുമായി മാസങ്ങളാണ് സന്തോഷ് പണ്ഡിറ്റ് മാറ്റിവച്ചത്. ഗജയിൽ തകർന്ന് തരിപ്പണമായി തമിഴ്നാട്ടിലെ ജില്ലകളിലേക്ക് സഹായവുമായുള്ള തന്റെ തമിഴ് പര്യടനത്തെ കുറിച്ച് ഫേസ്ബുക്കിൽ സന്തോഷ് പണ്ഡിറ്റ് വിവരങ്ങൾ പങ്കുവച്ചു. നാഗപട്ടണം, തഞ്ചാവൂർ, വേളാങ്കണ്ണി, പുതുകോട്ടൈ എന്നിവിടങ്ങളിൽ സഞ്ചരിച്ച് ചെറിയ സഹായങ്ങൾ ചെയ്യുവാനാണ് താൻ ഉദ്ദേശിക്കുന്നതെന്ന് താരം പറയുന്നു. കേരളത്തിലെ പ്രളയ സമയത്ത് കോടികളുടെ സഹായം നൽകിയ തമിഴ്നാടിനെ മറക്കരുതെന്നും താരം അഭ്യർത്ഥിച്ചിട്ടുണ്ട്.