പത്തനംതിട്ട: സ്നേഹിത@സ്കൂൾ പദ്ധതി കടമ്പനാട് കെ.ആർ.കെ.പി.എം ബോയ്സ് ആൻഡ് വൊക്കേഷണൽ ഹയർസെക്കൻഡറി സ്കൂളിൽചിറ്റയം ഗോപകുമാർ എം.എൽ.എ ഉദ്ഘാടനം ചെയ്തു. കുടുംബശ്രീ ജില്ലാ മിഷന്റെ നേതൃത്വത്തിൽ നടപ്പിലാക്കുന്ന സ്ത്രീ ശാക്തീകരണ പ്രവർത്തനങ്ങളിലെ നൂതന ആശയമാണ് സ്നേഹിത ജെൻഡർ ഹെൽപ്പ് ഡെസ്ക്. ഇതിനോടകം സ്നേഹിതയിൽ റിപ്പോർട്ട് ചെയ്യപ്പെട്ടത് 519 കേസുകളാണ്. ഇതിൽ 169 എണ്ണം കുടുംബപ്രശ്നങ്ങളാണ്. മാതാപിതാക്കൾ തമ്മിലുള്ള പ്രശ്നങ്ങൾ കുട്ടികളുടെ പഠനത്തേയും മനോനിലയേയും ദോഷകരമായി ബാധിക്കുന്നതായി കണ്ടെത്തി. ഇത്തരത്തിലുള്ള കുട്ടികളുടെ പ്രശ്നങ്ങൾ പരിഹരിക്കുന്നതിനും അവരെ ഭാവിയിലെ വാഗ്ദാനങ്ങളാക്കി മാറ്റുന്നതിനുമായാണ് കുടുംബശ്രീ മിഷൻ സ്കൂളുകൾ കേന്ദ്രീകരിച്ച് സ്നേഹിത@ സ്കൂൾ എന്ന പദ്ധതിയ്ക്ക് തുടക്കമിട്ടിരിക്കുന്നത്. മാസത്തിൽ ഒരു തവണ സ്നേഹിത കൗൺസിലറുടെ സേവനം കുട്ടികൾക്ക് ലഭ്യമാക്കുന്നതോടൊപ്പം വിവിധ പ്രചോദന ക്ലാസുകൾ, മാതാപിതാക്കൾക്കും അദ്ധ്യാപകർക്കും അവബോധ ക്ലാസുകൾ, വ്യക്തിത്വ വികസന ക്ലാസുകൾ എന്നിവയും ഈ പദ്ധതി വഴി നടത്തും. കടമ്പനാട് ഗ്രാമപഞ്ചായത്ത് പ്രസിഡന്റ് എ.ആർ അജീഷ്കുമാർ അദ്ധ്യക്ഷത വഹിച്ച പരിപാടിയിൽ പറക്കോട് ബ്ലോക്ക്പഞ്ചായത്ത് വൈസ് പ്രസിഡന്റ് എസ്. രാധാകൃഷ്ണൻ, ഗ്രാമപഞ്ചായത്തംഗങ്ങളായ മോനി കുഞ്ഞുമോൻ, ഉഷ വിജയൻ, രാധാമോൾ, കുടുംബശ്രീ അസിസ്റ്റന്റ് ജില്ലാമിഷൻ കോർഡിനേറ്റർ കെ.എച്ച് സെലീന, കുടുംബശ്രീ സിഡിഎസ് ചെയർപേഴ്സൺ അജി ബിജു, കുടുംബശ്രീ ജില്ലാ മിഷൻ പ്രോഗ്രാം മാനേജർ പി.ആർ അനുപ, സ്നേഹിത ജെൻഡർ ഹെൽപ് ഡെസ്ക് കൗൺസിലർ ഗായത്രി ദേവി, കടമ്പനാട് വിഎച്ച്എസ്ഇ പ്രിൻസിപ്പൽ ടി.രാജൻ, സ്കൂൾ പിടിഎ പ്രസിഡന്റ് സി. ഗോപിനാഥൻ, ഹെഡ്മിസ്ട്രസ് ആർ സുജാത, കമ്യൂണിറ്റി കൗൺസിലർ അഡ്വ മറിയാമ്മ തോമസ് എന്നിവർ പങ്കെടുത്തു.