ചാത്തന്നൂർ: ശ്രീനാരായണ ഗുരുവും ചട്ടമ്പിസ്വാമികളും തുടങ്ങിവച്ച നവോത്ഥാന മൂല്യങ്ങൾ വെല്ലുവിളി നേരിടുകയാണെന്ന് എൻ.കെ. പ്രേമചന്ദ്രൻ. എം.പി പറഞ്ഞു. എസ്.എൻ.ഡി.പി യോഗം ആർ.ശങ്കർ മെമ്മോറിയൽ ചാത്തന്നൂർ യൂണിയനിൽ നടന്ന ആർ.ശങ്കർ അനുസ്മരണ സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. ശബരിമല ആചാരവും അനുഷ്ഠാനവുമായി ബന്ധപ്പെട്ടുണ്ടായ വിഷയങ്ങൾ ഒരിക്കൽ കൂടി ശക്തമായ വേർതിരിവ് ഉണ്ടാക്കിയിരിക്കുന്നു. ഇത്തരം പ്രതിസന്ധി ഘട്ടങ്ങളിലാണ് ആർ. ശങ്കറിന് മുന്നിൽ കേരളം കടപ്പെട്ടിരിക്കുന്നതെന്നും അദ്ദേഹം പറഞ്ഞു.
തിരുവിതാംകൂർ ദേവസ്വം ബോർഡിന്റെ ആദ്യ അംഗം എന്ന നിലയിൽ എല്ലാ നവോത്ഥാന മൂല്യവും ഉയർത്തിപ്പിടിച്ചു തന്നെ ഹൈന്ദവ സമൂഹത്തിന്റെ ഉന്നമനത്തിനായി നല്ല പദ്ധതികൾ അദ്ദേഹം നടപ്പാക്കി. ഗുരുദേവന്റെ വിദ്യകൊണ്ട് പ്രബുദ്ധരാവുക എന്ന സന്ദേശം പ്രവൃത്തി പഥത്തിൽ കൊണ്ടുവന്ന നേതാവായിരുന്നു അദ്ദേഹം. മാനവികയതയുടെ മൂല്യങ്ങൾ ഉയർത്തിപ്പിടിച്ച നേതാവും കേരളത്തിന്റെ ആത്മവിശ്വാസത്തിന്റെ പ്രതീകവുമായിരുന്നു ആർ.ശങ്കറെന്നും പ്രേമചന്ദ്രൻ എം.പി അനുസ്മരിച്ചു. യൂണിയൻ പ്രസിഡന്റ് ബി.ബി. ഗോപകുമാർ അദ്ധ്യക്ഷത വഹിച്ചു. ഡോ.എൽ. വിനയകുമാർ, ഡി.സജീവ്, കെ. വിജയകുമാർ, ബി. സജൻലാൽ, തഴുത്തല എൻ. രാജു, ശോഭനാ ശിവാനന്ദൻ, ബീനാ പ്രശാന്ത്, ജി. രാജേഷ്, കെ. സുജയ്‌കുമാർ, കെ.നടരാജൻ എന്നിവർ സംസാരിച്ചു.