കൊല്ലം: പട്ടത്താനം സുബ്രഹ്മണ്യ സ്വാമി ക്ഷേത്രത്തിലെ സ്കന്ദഷഷ്‌ഠി ഉത്സവം ഭക്തിനിർഭരമായ ചടങ്ങുകളോടെ നടന്നു. നൂറു കണക്കിന് ഭക്തരാണ് മുരുക സ്തുതികളും കീർത്തനങ്ങളുമായി യജ്ഞവേദിയിലെത്തിയത്. പതിവ് ക്ഷേത്ര ചടങ്ങുകൾക്ക് പുറമെ അഷ്ടദ്രവ്യ മഹാഗണപതിഹോമം നടന്നു. തുടർന്ന് ശതകുംഭ കലശപൂജ, സഹസ്രനാമാർച്ചന എന്നിവയും ഉണ്ടായിരുന്നു. പഞ്ചാമൃതം, പാൽ, ഭസ്മം, ജലം എന്നിവ നിറച്ച കലശങ്ങൾ വഹിച്ച് ഭക്തജനങ്ങൾ ഭഗവാനെ പ്രദക്ഷിണം ചെയ്തു. സർവാഭീഷ്ട സിദ്ധിക്കായി ആൽമരച്ചുവട്ടിൽ ഷഷ്ഠീദേവി പൂജ, സ്കന്ദഷഷ്ഠി പൂജ, ഷഷ്ഠിവ്രതക്കാർക്കുള്ള ഷഷ്ഠിചോറ് വിതരണം എന്നിവയോടെയാണ് ഉത്സവം സമാപിച്ചത്.