കൊല്ലം: മൃഗീയവും മനുഷ്യത്വഹീനവുമായ പീഡനമാണ് തനിക്കെതിരെ പൊലീസും ഭരണകൂടവും നടത്തുന്നതെന്ന് റിമാൻഡിൽ കഴിയുന്ന ബി.ജെ.പി സംസ്ഥാന ജനറൽ സെക്രട്ടറി കെ. സുരേന്ദ്രൻ പറഞ്ഞു. കണ്ണൂർ മജിസ്ട്രേറ്റ് കോടതിയിൽ ഹാജരാക്കാൻ ഇന്നലെ കൊട്ടാരക്കര സബ് ജയിലിന് പുറത്ത് കൊണ്ടുവന്ന സുരേന്ദ്രൻ മാദ്ധ്യമങ്ങളോട് പ്രതികരിക്കുകയായിരുന്നു.
കണ്ണൂരിലേക്ക് പോകാൻ ഭയമില്ല. ജയകൃഷ്ണൻ മാസ്റ്ററടക്കമുള്ള വീരബലിദാനികളുടെ നാടാണത്. മരണത്തെ ഭയമില്ലാത്തവൻ കണ്ണൂരിൽ പോകാൻ എന്തിന് ഭയക്കണം? പൊലീസ് കള്ളക്കേസുകൾ ചുമത്തുകയാണ്. തനിക്ക് അറിവില്ലാത്ത കേസുകളാണ് മിക്കതും. സമൻസ് ലഭിക്കാറില്ല. കോഴിക്കോട്ട് നിന്ന് പുതിയൊരു കേസിൽ വാറണ്ട് വന്നിരിക്കുന്നു. ചിറ്റാർ സ്റ്റേഷൻ ആക്രമിച്ചെന്ന് മറ്റൊരു കേസ്. തന്നെ വലിച്ചിഴച്ചുകൊണ്ട് പോകുന്നത് മാദ്ധ്യമങ്ങൾ റിപ്പോർട്ട് ചെയ്തതാണ്. ഫേസ്ബുക്കിലൂടെ പൊലീസിനെ വിമർശിച്ചതാണ് കണ്ണൂരിൽ ചെയ്ത കുറ്റം. ധൈര്യമായി നേരിടാൻ തന്നെയാണ് തീരുമാനമെന്നും സുരേന്ദ്രൻ പറഞ്ഞു.