തിരുവനന്തപുരം: ട്രഷറി സേവിംഗ്സ് അക്കൗണ്ടിൽ പെൻഷൻ എത്തിയാൽ ഇനി മൊബൈൽ ആപ്പ് പറഞ്ഞു തരും. ഇതിനായി കേരള പെൻഷൻ എന്ന പേരിൽ ആൻഡ്രോയിഡ് ആപ്പ് നിർമ്മിച്ചിരിക്കുകയാണ്. 15 മുതൽ സംസ്ഥാനത്തെ 4.75 ലക്ഷം പെൻഷൻകാർക്ക് ആപ്പ് നൽകും.സ്മാർട്ട് ഫോണുള്ള പെൻഷൻകാർക്കെല്ലാം ട്രഷറിയുമായി ബന്ധപ്പെട്ടാൽ ആപ്പ് ഇൻസ്റ്റാൾ ചെയ്യാനാകും. ഇൻസ്റ്റാൾ ചെയ്തു കഴിഞ്ഞാൽ പെൻഷൻ വരുമ്പോഴൊക്കെ

മൊബൈൽ ഫോണിൽ അലാറാം വരും. തുറന്ന് നോക്കിയാൽ എത്രരൂപ അക്കൗണ്ടിലെത്തിയെന്നും അറിയാം. രാജ്യത്ത് ആദ്യമായാണ് പെൻഷൻകാർക്ക് മൊബൈൽ ആപ്ളിക്കേഷൻ വരുന്നത്.ഇൻഫോമാറ്റിക്സ് സെന്ററാണ് ആപ്പ് വികസിപ്പിച്ചത്.പെൻഷന് പുറമെ ശമ്പളം വാങ്ങുന്ന സർക്കാർ ജോലിക്കാർക്കും പുതിയ മൊബൈൽ ആപ്ളിക്കേഷൻ അണിയറയിൽ ഒരുങ്ങുന്നുണ്ട്. കേരള ട്രഷറി സേവിംഗ്സ് ബാങ്ക് എന്ന കേരള ടി.എസ്.ബി. ആപ് തയ്യാറാകുന്നതോടെ ശമ്പളം വാങ്ങുന്നവർക്ക് എത്ര നെറ്റ് സാലറിയെന്നും ഡിഡക്ഷനും മൊബൈൽ ഫോണിലൂടെ അറിയാനാകും. ട്രഷറിയിലെ സേവിംഗ്സ് ബാങ്ക് ഇടപാടുകൾക്ക് മൊബൈൽ നെറ്റ് വർക്കിംഗ് സംവിധാനം ഏർപ്പെടുത്തുന്നതിനെകുറിച്ചും സർക്കാർ ആലോചിച്ചുവരികയാണ്. ട്രഷറിയെ കൂടുതൽ നിക്ഷേപ സൗഹൃദമാക്കി കൂടുതൽ നിക്ഷേപങ്ങൾ സർക്കാർ ചെലവുകൾക്ക് എത്തിക്കുകയാണ് പുതിയ പരിഷ്കാരങ്ങളുടെ ലക്ഷ്യം.