തിരുവനന്തപുരം: മലയാള സിനിമയിലെ പുതുപ്രവണതകളും പരീക്ഷണങ്ങളും സിനിമാ പ്രേക്ഷകർക്ക് മുന്നിൽ അവതരിപ്പിക്കുകയെന്നതാണ് മേളയിലേക്കുള്ള മലയാള ചിത്രങ്ങളുടെ തിരഞ്ഞെടുപ്പിന് അവലംബമാക്കിയതെന്ന് സംവിധായകനും സെലക്‌ഷൻ കമ്മിറ്റി ചെയർമാനുമായ സിബി മലയിൽ പറഞ്ഞു. ജൂറിയുടെ മുൻപിലെത്തിയ 93 ചിത്രങ്ങളിൽ 12 ചിത്രങ്ങൾ മലയാള സിനിമ ഇന്ന് വിഭാഗത്തിലേക്കും ലിജോ ജോസ് പെല്ലിശേരി സംവിധാനം ചെയ്ത ഈ.മ.യൗ, സക്കറിയയുടെ സുഡാനി ഫ്രം നൈജീരിയ എന്നിവ മത്സര വിഭാഗത്തിലേക്കും തിരഞ്ഞെടുക്കപ്പെട്ടു. മലയാള സിനിമ ഇന്ന് വിഭാഗത്തിലെ പത്ത് ചിത്രങ്ങളും നവാഗത സംവിധായകരുടേതാണ് എന്നതാണ് ഈ പാക്കേജിലെ സവിശേഷത. പുതുകാഴ്ചപ്പാടുകൾ സമ്മാനിക്കുന്ന യുവതലമുറയിൽ ഏറെ പ്രതീക്ഷയുണ്ടെന്നും സിബി മലയിൽ പറഞ്ഞു.