കായംകുളം : പ്രായപൂർത്തിയാകാത്ത വിദ്യാർത്ഥി ഉൾപ്പെടെ മൂന്ന് ബൈക്ക് മോഷ്ടാക്കൾ പെട്രോളിംഗിനിടയിൽ രാത്രിയിൽ പൊലീസിന്റെ വലയിലായി.

കായംകുളം പത്തിയൂർ അങ്ങാടിശേരിൽ അജിത്ത് (21) കരുനാഗപ്പള്ളി വവ്വാക്കാവ് തഴവമുറി ഹരികൃഷ്ണ ഭവനത്തിൽ ഹരികൃഷ്ണൻ (18) എന്നിവരും പ്രായപൂർത്തിയാകാത്ത ഒരാളുമാണ് അറസ്റ്റിലായത്. കഴിഞ്ഞ ദിവസം രാത്രി പത്തിയൂർ മേഖലയിൽ പട്രോളിംഗ് നടത്തവെ സംശയാസ്പദമായ രീതിയിൽ മൂന്നുപേർ കയറി വന്ന ബൈക്ക് പൊലീസ് തടഞ്ഞു നിർത്തി. തുടർന്ന് വാഹനം ഉപേക്ഷിച്ച് ഓടിപ്പോകാൻ ശ്രമിച്ച പ്രതികളെ കരീലക്കുളങ്ങര എസ്. ഐ യുടെ നേതൃത്വത്തിലുള്ള പൊലീസ് സംഘം ഓടിച്ചിട്ട് പിടികൂടുകയായിരുന്നു.

തുടർന്ന് നടത്തിയ ചോദ്യം ചെയ്യലിൽ ഓച്ചിറയിൽ വൃശ്ചികോത്സവത്തിനെത്തിയ ഓച്ചിറ സ്വദേശിയുടെ ബൈക്ക് മോഷ്ടിച്ചത് ഇവരാണെന്ന് തിരിച്ചറിഞ്ഞു. തെളിവെടുപ്പിനായി ഹരികൃഷ്ണന്റെ വീട്ടിൽ എത്തിയപ്പോൾ മോഷ്ടിച്ച മറ്റൊരു ബൈക്ക് കൂടി പൊലീസ് കണ്ടെടുത്തു.