ആലപ്പുഴ: പ്രളയത്തിൽ കറവപ്പശുക്കളെ നഷ്ടപ്പെട്ട രണ്ടുപേർക്കുകൂടി ഡൊണേറ്റ് എ കാറ്റിൽ പദ്ധതി പ്രകാരം രണ്ടു പശുക്കളെ വിതരണം ചെയ്തു. സിനിമ താരം പൃഥ്വിരാജും ആന്ധ്രപ്രദേശ് റൂറൽ ഡവലപ്‌മെന്റ് ട്രസ്റ്റുമാണ് പശുക്കളെ നൽകിയത്. ആലപ്പുഴ ക്ഷീരവികസന വകുപ്പ് ഡെപ്യൂട്ടി ഡയറക്ടറുടെ ഓഫീസ് പരിസരത്ത് നടന്ന ചടങ്ങിൽ പൃഥ്വിരാജിന്റെ അമ്മയും നടിയുമായ മല്ലിക സുകുമാരൻ പശുക്കളെ കൈമാറി. സബ് കളക്ടർ വി.ആർ കൃഷ്ണതേജ പങ്കെടുത്തു.

വെളിയനാട് ബ്ലോക്കിലെ മറിയാമ്മ ചാക്കോ, ആര്യാട് ബ്ലോക്കിലെ നിഷാദ് എന്നിവർക്കാണ് കറവപ്പശുക്കളെ വിതരണം ചെയ്തത്. ഇതോടെ ജില്ലയിലെ 74 കർഷകർക്കാണ് വിവിധ ദാതാക്കളുടെ സഹായത്തോടെ പശുക്കളെ ലഭിച്ചത്. പദ്ധതി പ്രകാരം 133 ക്ഷീര കർഷകർക്ക് കറവപ്പശുക്കളെ ലഭിക്കും. ചടങ്ങിൽ ക്ഷീര വികസന ഡെപ്യൂട്ടി ഡയറക്ടർ കെ.ജി.ശ്രീലത, ക്ഷീരമേഖലയിലെ ജില്ലാ പ്രളയ ദുരിതാശ്വാസ സമിതി ചെയർമാൻ വി. ധ്യാനസുതൻ, അസി.ഡയറക്ടർ സി.ഡി. ശ്രീലേഖ, നഗരസഭ കൗൺസിലർമാരായ എ.എസ്. കവിത, പ്രസന്ന ചിത്രകുമാർ, ക്ഷീര വികസന ഓഫീസർമാരായ കെ. രാജി, പി.സുനിത, എസ്. ഗീത, എസ്.ശ്രീജ, സെൽമ ബീവി തുടങ്ങിയവർ പങ്കെടുത്തു.