ചേർത്തല: കെ.എസ്.ആർ.ടി.സി ബസിൽ നിന്ന് കഞ്ചാവുമായി ആറ്റിങ്ങൽ സ്വദേശികളായ രണ്ടു യുവാക്കളെ മുഹമ്മ പൊലീസ് പിടികൂടി.ഇവരിൽ നിന്ന് രണ്ടര കിലോ കഞ്ചാവ് കണ്ടെടുത്തു.

ആറ്റിങ്ങൽ തോട്ടക്കാട്ട് പഞ്ചായത്ത് 10-ാം വാർഡിൽ ഗോകുലത്തിൽ വിഷ്ണു (23) ,12-ാം വാർഡ് മണ്ഡകം പുത്തൻവീട്ടിൽ മനോജ് (33)എന്നിവരാണ് പിടിയിലായത്.ആലപ്പുഴ നർക്കോട്ടിക് സെല്ലിന് ലഭിച്ച രഹസ്യവിവരത്തിന്റെ അടിസ്ഥാനത്തിൽ, ഇന്നലെ രാവിലെ 11 ഓടെ കോട്ടയം-ആലപ്പുഴ റൂട്ടിലോടുന്ന കെ.എസ്.ആർ.ടി.സി ബസ് പുത്തനങ്ങാടിയിൽ എത്തിയപ്പോഴാണ് പൊലീസ് പരിശോധന നടത്തിയത്. മുഹമ്മയിലെ വില്പനക്കാർക്ക് കൈമാറാണ് കഞ്ചാവ് കൊണ്ടു വന്നതെന്ന് പൊലീസിന്റെ ചോദ്യം ചെയ്യലിൽ പ്രതികൾ സമ്മതിച്ചു. മുഹമ്മ എസ്.ഐ.ടോൾസൺ പി.ജോസഫ്, നർക്കോട്ടിക് സെല്ലിലെ ഉല്ലാസ്,ജാക്‌സൺ,മുഹമ്മ സ്​റ്റേഷനിലെ സിവിൽ പൊലീസ് ഓഫീസർമാരായ റെജിമോൻ,ഓമനക്കുട്ടൻ,സുധീർ,സന്തോഷ്,ദിലീഷ് എന്നിവരാണ് പൊലീസ് സംഘത്തിലുണ്ടായിരുന്നത്. പ്രതികളെ ഇന്ന് ചേർത്തല കോടതിയിൽ ഹാജരാക്കും.