ചേർത്തല: അർത്തുങ്കൽ ഫിഷ് ലാന്റിംഗ് സെന്ററിലെ പുലിമുട്ടിൽ നിന്ന് സ്കൂൾ യൂണിഫോമിൽ കടലിൽ ചാടിയ മൂന്നു പ്ളസ് വൺ വിദ്യാർത്ഥിനികളെ, ഇവിടെ ചൂണ്ടയിട്ടുകൊണ്ടിരുന്ന യുവാവ് സാഹസികമായി രക്ഷിച്ചു.

ഇന്നലെ വൈകിട്ട് അഞ്ചേകാലോടെയായിരുന്നു സംഭവം. മണ്ണഞ്ചേരി പഞ്ചായത്ത് 12-ാം വാർഡ് കുന്നുംകണ്ടം കോളനിയിൽ സുധീർ (23) ആണ് രക്ഷകനായത്. സ്‌കൂൾ യൂണിഫോമിൽ എത്തിയ കുട്ടികൾ തന്റെ കയ്യിൽ നിന്ന് ഫോൺ വാങ്ങി ആരോടോ സംസാരിച്ച ശേഷം ഫോൺ തിരികെയേൽപ്പിച്ച് പുലിമുട്ടിന്റെ അ​റ്റത്തേക്ക് നടന്നപ്പോൾ അവിടേക്ക് പോകരുതെന്ന് പറഞ്ഞെങ്കിലും കുട്ടികൾ ബാഗ് ഉപേക്ഷിച്ച ശേഷം ചിരിച്ചുകൊണ്ട് മുന്നോട്ട് നീങ്ങുകയായിരുന്നെന്ന് സുധീർ പറഞ്ഞു. ആദ്യം ഒരാളും പിന്നാലെ രണ്ടു പേർ ഒന്നിച്ചും കടലിലേക്ക് ചാടി. പിന്നാലെ ചാടിയ സുധീർ ആദ്യം ചാടിയ കുട്ടിയെ കരയ്‌ക്കെത്തിച്ചു. ഈ സമയം മ​റ്റ് രണ്ടു പേർ ഏറെ ദൂരം ഒഴുകി നീങ്ങിയിരുന്നു. പിന്നീട് ഇരുവരെയും ഒരുമിച്ച് കരയ്ക്കെത്തിക്കുകയായിരുന്നു.

ഈ സമയം ബോട്ടിലെത്തിയ തൊഴിലാളികൾ കരയിലുള്ളവർക്ക് വിവരം കൈമാറിയതോടെ നാട്ടുകാർ തടിച്ചുകൂടി.സ്ഥലത്തെത്തിയ പൊലീസ് ഇവരെ ആംബുലൻസിൽ സ്വകാര്യ ആശുപത്രിയിൽ എത്തിച്ച് പ്രാഥമിക ശുശ്രൂഷ നൽകിയ ശേഷം ആലപ്പുഴ മെഡിക്കൽ കോളജ് ആശുപത്രിയിലേക്ക് മാ​റ്റി. കടലിൽ ചാടിയതിന്റെ കാരണം അറിവായിട്ടില്ലെന്ന് അർത്തുങ്കൽ പൊലീസ് പറഞ്ഞു.